Leitak le Hmawngtlang Buainak Kong ah Leitak Lei in Mi Zapi Sin Fianternak

| The Chin Journal | Hakha, Chin State

A tanglei ca hi Leitak le Hmawngtlang naite an buainak kong ah Leitak lei nih fianternak an tialmi a si. Hi ca chung ah hin The Chin Journal ruahnak le dirhmun aa tel lo. Leitak khuami hna fianternak le dirhmun a si timi theihternak tuah kan duh.

Leitak le Hmawngtlang Buainak Kong ah Leitak Lei in Mi Zapi Sin Fianternak

Leitak ram chungah Hmawngtlang khuami umnak nawl rak peknak: Ramuk bawi Pu Mang Hnin chan 1940 ah Phaipha khua in Pu Za Khar le hawi nih Leitak Ramuk bawi le khuami sinah nan nelrawn ah Lei thuannak nawl kan pe ko uh tiah an rak nawl hna. Caansaupi ceihttinak an ngeih hnu ah a tanglei lungtlinnak he lei tuahnak nawl cu Dec 7, 1940 ni ah Leitak nih an rak pek hna.

Lei tuahnak nawl peknak Phunglam

  1. Khuate an si lai.
  2. Sakhua rawlrel nan pek lai.
  3. Inn le ṭhingṭhang, lawngpi remh a herh tikah Leitak mi nihlawh zat in nan ṭuan lai.
  4. Leitak min in ngunkhuai nan pek lai.
  5. Nel/Lei cawh ding lawng a hmun pek nan si lai.
  6. Hi hmun in hmun dang ah a pem ṭhanmi cu a inn siseh, a lei siseh ka lak ṭhan lai.
  7. Ka fapa Sang Vung a zat in Khuabawi caah an umpi hna lai.

A cunglei phunglam (7) zulh ding hnatlaknak cu Leitak in Pu Mang Hnin le hawi paruk, Phaipha in Pu Ram Ngai le hawi pali nih min an thut.

Phunglam fianternak

  • Khuate an si lai.

Leitak khuate nan si lai a ti duhnak a si i, Leitak Ramuk bawi pennak tang ah Leitak khuate (ရြာသိမ္ရြာငယ္ ) dirhmun in February 20, 1948 tiang an rak um.

  • Sakhua rawlrel nan pek lai.

Sakhua rawlrel nan pek lai timi cu ramsa an kah tikah siseh, khua chungah chunthah sathah a um tikah siseh, kum vui thlairawl an chuahpimi chungin siseh, ramuk bawi an pekmi a si. Ralkap cozah an kai hnu 1965 tiang ram ngei le ramuk bawi sin ah lo-nga ram-nga an rak pek.

  • Inn le ṭhingṭhang, lawngpi remh a herh tikah Leitak mi nihlawh zat in nan ṭuan lai.

20 February 1948 tiang Hmawngtlang khuami nih Leitak Ramuk bawi inn, ṭhingṭhang, lawngpi remh a herh tik caan paoh ah Leitak khuami he nihlawh aa tluk in an remh tawn.

  • Leitak min in ngunkhuai nan pek lai.

Hmawngtlang khua cu Leitak khuate an si caah Leitak min in ngunkhuai an rak pek. Hmawngtlang khua min in ngunkhuai an rak pe bal lo.

  • Nel/Lei cawh ding lawng a hmun pek nan si lai.

Lei facang cinnak hmun lawng pek an rak si. Tlangram (Lai lo, Zo lo le Tlang lo) thlawh an duh ahcun Leitak bawitlang sin sathi luanh in hal a si zungzal. Kum 2015 zongah atu an umnak Hmawngtlang khuachak (Dar Hmuh Lopil) zong sathi luanh in Leitak sinah an rak kan hal i tuahnak nawl kan pek hna.

  • Hi hmun in hmun dangah a pem ṭhanmi cu a inn siseh, a lei siseh ka lak ṭhan lai.
  1. Dongva khuami Pu Er Ling cu Hmawngtlang ah a rak pem nain Dongva khua ah a kir ṭhan caah a lei hmun cu Leitak khuami sinah a ap ṭhan.
  2. Pu Za Khar le Pu Ni Dun cu 1960 ah khuabawi an i cuh i Pu Za Khar nih a tei. Pu Ni Dun cu lungfah in a hawi inndong (18) he Kalaymyo peng, Kyar-inn khua ah an pem. Cu inndong 18 nih cun phunglam ning tein Leitak kut ah an lei an ap than.
  3. Pu Mang Hnin nih a fanu va Pu Sa Khong (Aibur khuami) cu amah lei hmun pawngah lei a tuahter ve. Pu Sa Khong nih Hmawngtlang khuami sinah a zuar. Cucu phunglam he aa kalh caah ram ngei Leitak sinah a phan ṭhan ve.
  • Ka fapa Sang Vung a zat in Khuabawi caah an umpi hna lai.

1948 Kawlram luatnak ngah hnu in ukning aa thlen cang caah Pu Mang Hnin fapa Sang Vung zong khuabawi a va ṭuan  ti lo.

Hi phunglam nih Pu Mang Hnin (Ramuk bawi) nih Hmawngtlang khua cu lei tuahnak nawl lawng a rak pek hna i ram a rak cheu hna lo timi fiang tein a langhter.

Leitak Ramri Umtuning

  1. Leitak Ramri (Boundary) cu Mirang uk lio April 28, 1913 ah H.E Fisher sin ah Pu Mang Hnin nih ttha tein a rak tuah cang.
  2. Hmawngtlang cu kum 1941 ah Leitak khua sang pakhat dirhmun in tualbok inn in an rak um hmasa. September 22, 1949 lawng ah Headman Register(သူႀကီးလယ္ဂ်ာ) tuahpiak an si nain Leitak ramchung a ummi khua (sang pakhat) dirhmun in rak chiah an si caah ramri an rak tuahpiak hna lo.
  3. Hmawngtlang khua cozah nih Headman Register an khumh (kum 1949) hnu zong ah Leitak ram chungah Hmawngtlang ramri pek le tuahpiaknak a um lo. Chinmi Ramuk bawi an khuate paohpaoh nih Ramuk bawi ram i hrawm dih a si.

Hmawngtlang Nih Ramri Hal Hram An Thawknak

  1. Hmawngtlang nih Ramuk bawi Pu Mang Hnin a thih hnu 1947 ah Leitak ram chung lei tuah awk a ṭhami hmun vialte cu Hmawngtlang kan ta a si cang caah, Leitak nih leihmun thar nan tuah kho lo tiah Vuanthok zung ah taza an kan cuai colh. Sihmanhsehlaw Hakha Vuanthok zung ah siseh, Falam Zipeng zung ah siseh Leitak nih kan rak tei hna. Cu kum thawk in nihin ni tiang ramri kong ah buaibainak a um hi a si.
  2. 1959 April thla ah Chin Yeya Vuanci (ခ်င္းေရးရာဝန္ႀကီး) Pu Ral Hmung le hawi, peng an tlawn lioah Hmawngtlang khuabawi Pu Za Khar nih Hmawngtlang ram kan ngei lo, Leitak nih ram kan cheu hna seh tiah a rak hal.
  3. Cucaah Mangki bawi Thawng Cin Thang nih Dec 5, 1959 ah Hmawngtlang khua in Leitak le Hmawngtlang khuami cu a auh hna i biahalnak a ngeih hna. U Thawng Cin Thang nih Leitak cu Hmawngtlang hi nan ram nan cheuh kho hna lai maw? tiah a hal hna.
  4. Kan ram kan cheu kho hna lo, ram ngeih an duh ahcun Leitak he rak i fonh hna sehlaw Leitak ram cu an ram a si ve ko lai tiah an rak leh.
  5. Cucu Hmawngtlang khuami nih an rak duh lo caah Mangki bawi nih Leitak cu a nawlpiak ṭhan hna, Leitak nih kan Pu Mang Hnin chan ah thing le far lak nakding a tuahpiakmi hna hmun tu hmang ve hna seh tiah an leh.
  6. Dec 6, 1959 ah Mangki bawi U Thawng Cin Thang nih Kuhchah khua in Leitak khuami hnatlak ning tein cu hmunhma cu (Anhmawngva-Thanghawr, Thanghawr-Belleikhurva, Belleikhurva-Thirinn va-Sachialaiva-Hmawngtlang bo, Hmawngtlang bo-Hmawngtlangva-Anhmawngva, Anhmawngva-Thanghawr) Hmawngtlang nih ṭuanvo lak ding khuate hmunhma (တာဝန္ယူရန္ ေက်းရြာ နယ္ေျမ) tiah Temporary Order a rak chuah.
  7. Mangki bawi chuahmi Temporary Order cu a dotdot in fehter awk ah Hakha vuanthok nih Zipeng bawi sin a kalter tikah Belleikhurva in Sachialaiva timi cu Lungbiava in Vansitva tiah aa thleng ai. Cuning cun Zipeng J. Ning Ling nih khua 2 lung tlin cia in a ruah caah khua hnih Bawitlang nih min nan thut lai i kaphnih lungtlinnak ramri lung nan phun hnu ah Zipeng zung ah report nan pek lai tiah June 30, 1961 ah order a rak chuah. Vuanthok nih pehzulh in minthut lungphun a tuahter hna lo caah fehtermi order a si lo.
  8. Zipeng bawi J.Ning Ling order cu Hmawngtlang nih an duh lonak langhter in August 1, 1961 ah Pu Za khar nih Mangki bawi Thawng Cin Thang sinah a sawk (အယူခံ) ṭhan hoi.

Hmawngtlang Nih Ramri Halnak Kong Ah A Donghnak Bik 28.10.1965 Mangki Order

March 1962 ah Ralkap cozah nih uknak an lak caah hi bantuk buaibainak cu kum 1965 tiang an tawlrel kho lo. Kum 1965 ah cozah lei in thil tampi aa thleng ve. Cu lakah  Ramuk bawi Pu Mang Hnin le pupa ram ngei Pu Khen Bil sinah Hmawngtlang nih an rak pek tawnmi ram-nga(lo-nga) cu June 1965 thawkin an pe ve ti lo.

Ramri kongkau cu Oct 10, 1965 ah Mangki bawi U Thawng Cin Thang hruainak in, ခ်င္း တလက/ ခလက/နလက le ခ်င္းေရးရာဦးစီး (Mangki zung) fonh in ceihhmainak an ngeih hnu ah

1959-61 ေက်းရြာအမႈတြဲ No. 21/4/(H) ah rak chuahmi DC order kha Mangki bawi nih  a hrawh i a tanglei bantuk in order a chuah tthan.

  1. Hmawngtlang le Leitak khua hna cu a hmasa an rak um tawnning tein umter ding, (မူလအတိုင္း ဗိုလ္ေနၿမဲ – က်ားေနၿမဲ တည္ရွိေစရန္)
  2. Hmawngtlang khuami hna nih lei hmun tuahnak ah harsatnak a um ahcun aa pehtlaimi လအက (or) Leihmun committee (လယ္ယာေကာ္မတီ) ah theihter in tawlrel ding, ti a si.

Mangki bawi U Thawng Cin Thang order (28.10.1965) hi rikhiah mi caan chungah cunglei zungah Hmawngtlang lei in azukhan-nak a um ti lo caah remh khawh ti lomi order (အျပီးအျပတ္အမိန္႔) a si.

Hmasa an rak um tawnning tein (ဗိုလ္ေနၿမဲ – က်ားေနၿမဲ) umter ding tihi voikhat hman a si cang: Hmawngtlang an biakam ah Leitak ram kan chuahtak ahcun leihmun cu ram ngei Leitak kut ah kan pek tthan lai an ti bantuk in 1961 ah Hmawngtlang in Kalaymyo peng Kyarinn khua ah a pemmi inn 18 hna nih an lei hmun cu ram ngei Leitak kut ah an pek tthan hna i lei an rak cawhnak nihlawh man kha Leitak nih an pek ve hna. Cucu Hmawngtlang bawitlang nih an duh lo i Zipeng J.Ning Ling chan ah taza an rak cuai hna. Leitak nih an rak tei hna i Hmawngtlang nih Mangki zung ah a zu an rak khan.

Cu leihmun hna cu Leitak nih 1961 thawkin thuan hram an thawk. Kum 1967 June thla ah Pu Mang Hnin nupi Pi Khuang Cin le a fanu Pi Ngun Tial, Pi Bawm Zing hna cu an lei an rak thuan lioah Pu Za Khar le Hmawngtlang tlangval hna nih an leihmun cia ah an rak velh hna. Cucaah Feb 25, 1968 ah ခ်င္းဝိေသသတိုင္းေျမယာေကာ္မတီ nih bia an rak ceih hna. Hruaitu ah Major Vum Thu Hashing a rak si i ram ngei Leitak nan buaihnawh ngammi hna cu nan ral a ttha tuk tiah Hmawngtlang cu a rak sik hna. 1968 chung lila ah တိုင္းေျမယာေကာ္မတီ nih Kyarinn pem leihmun dihlak cu Leitak kut ah an rak pek dih i, nihin tiang Leitak nih an i ngeih lan. Hi biachahnak hi Hmasa an rak um tawnning tein (ဗိုလ္ေနၿမဲ – က်ားေနၿမဲ) timi Order chirchanh in a rak si. Cu hnu cun Hmawngtlang an lung a fim ve i dawrem tein khua kan sati.

Kum 50 tluk dawrem tein khua kan sati cang: Hmawngtlang lei in a kan buaipi tawnmi hi khuabawi le upa 4-5 khi an si ko i 1968 hnu cun dai tein an um cang. Hmawngtlang mipi le Leitak khuami cu kan i daw ngai hna. An hman khawhmi hmunhma (တာဝန္ယူရန္ ေက်းရြာ နယ္ေျမ) lonh in an satil zong Leitak ram chungah an tlawng. Tlangram thlawh le far thing lak an duh ah Leitak bawitlang sin an hal hna i kumtin an pek hna. Nu le va in kan i thi um. Kan chiatthat zong kan i hrawm. Hi hmunhma chung ah anmah duh in tihthing, far, dumhau zalhnak le dum tuahnak ah an hman. Kan i daw, aa hua kho ding kan si lo.

Cozah Lamsul Remh ning le Zohkhenh Ning: Cozah nih cozah lampi zohkhenh ding in tuanvo pek a si bantuk in Leitak nih 1982 tiang hrawng Belleikhurva tiang cozah lampi cu kan rak remh tawn i, 1982 in 2010 tiang khuabawitlang hna nih ri tuk mi ning (Lungbiava tiang) kan rak remh. Hi lam zohkhenh le remhnak hi ramri kong he zeihmanh pehtlainak a ngei lo.

Modern Leitak Khua Sernak: Leitak khua cu khua thum in kan um tikah thanchonak a kan donh ngaingai. Cucaah hmunkhat ah i fonh khawhnak ding caah ramchung ramleng ttanrual in Modern Leitak ser timh a si i, Leitak khua thum sinah siseh Hmawngtlawng khua ah siseh vok thah zanriah dumtinak in sawmnak (si-zung-zi) voihnih tiang tuah a si. Hi program kan thawk cangka cozah sin ah theihternak kan tuah hmasa. Modern Leitak khua hunnak tuah lio ah Hmawngtlang zong nih caw pakhat in an rak kan lawmhpi ve. Asinain Hmawngtlang khuami nih 2016 ah ruah lopi in cozah sin in an rak kan kham.

Cozah lei remhchunhnak: Hmawngtlang nih khua ser an hung kan kham cangka TAO Officer cu amah pumpak 20.3.2017 ni ah a ra i sang kan tlaknak hmun a zoh colh. Leitak le Hmawngtlang ramri kong ah cozah lei order umtuning tha tein zohfelnak a ngeih dih hnuah kan khua 2 in hmunkhat ah a kan auh i nan rak um tawn ning tein dawrem tein khua satti uh tiah a kan remh chunh i khua 2 lungtlin hnatlaknak a kan lak. Hmawngtlang zong an lung a tling ve nain Township ah min thut caan a phak tik ah Hmawngtlang nih minthut duh loin an i let than i DC zung ah report ca an chiah than. Chin state cozah Secretary nih August 2017 ah voi khat tlang a rak kan tlak than nain pehzulh in tuanchuah a si lo tik ah kan buai thiamthiam, Vice President tiang report kan i tuah hnu ah a rak ra tthanmi cu hlan an um tawnning in dawrem tein um hna seh ti a si tthan i Hmawngtlang Cezua Ohsuh Ohchohzihmu sin ah ttuanvo an pek.

Leitak Khuami lei in remnak caah zuamnak: Hi ti kan buaimi ah remdaihnak hi kanmah ah a um ko tiah kan ruah caah 24, 26 December 2018 ah Sang thum khuapi meeting kan tuah i Hmawngtlang cezua Ohchoh zihmu hruainak in tonbiaruahnak ngeih in remdaihnak ser awk ah a tanglei biafang hna cu Leitak mipi biafunnak he i ken a si-

  1. Leitak le Hmawngtlang khua hna cu kum 1941 thawk in Leitak ramchung ah dawrem tein hmunkhatte ah khua a sami kan si.
  2. Hi ramchung ah a ummi ti, vawlei, kokek thingram vialte hi khuate komh khuabawi hna tawlrelnak in hman, zohkhenh le kilven a si lai i pumpak chawlehnak caah hman lo ding.
  3. Leitak nih Lungbia va ral ah hmun kauh chap in inn an sakmi lungtling tein cohlan ding.
  4. Cozah sinah kaphnih nih chiahmi ca vialte lak ṭhan dih ding.

Leitak khua sang thum aiawh in sang bawitlang lutlai hna, khua nupa 10 hna le Hmawngtlang khuami hna tonbiaruahnak cu Dec 30, 2018 ah Cezua Ohchok zihmu Pu That Vung hruainak in ngeih a si. Leitak lei in an i kenmi cu 27.10.1965 lio Pu Thawng Cin Thang order 1nak chirchanh in Leitak le Hmawngtlang cu 1941 thawk in Leitak ram ah daw le rem tein khua a rak sa kan si bantuk in sati peng usih tiah an sawm hna.

Hi Leitak ram hi Hmawngtlang he Leitak he hmunkhat ah kan hmangti lai. Kan zohkhenhtti lai. Ohsuh pakhat kan si, ram pakhat aa hrawm kan si caah khuate komh khua bawitlang hna tawlrelnak in hman le zohkhenh a si lai timi Order 2nak, လအက (or) Leihmun committee (လယ္ယာေကာ္မတီ) nih a tawlrel lai timi kan i ken rih. Aa hua ding kan si lo. Report vialte la dih usih kan ti hna. Hihi an duh ti lo ahcun khua tthanchonak rian kan ttuanmi dawnh duh men a si ko tiah kan hmuh.

Chin state cozah nih tlangtlaknak: Chin state cozah nih April 20, 2019 ah Leitak he Hmawngtlang he a dangdang in siseh, hmunkhat ah siseh ton biaruahnak an kan ngeih. An kan ti nolhmi cu nan um tawnning in dawrem tein um u. Nan khuahnih fonh in khuapi sinak (ၿမိဳ႕) kan in pek hna lai, ti a si.

Hi bia cohlan awk ah Zophei kan pa MP Dr. Hmuh Thang zong nih 13.6.2019 ni ah Hmawngtlang tiang a rathnawh hna i nan lung thumh ko u, Zophei caah caanttha a si, nan lungtlin pi ko hna u, tiah a chimh hna nain Hmawngtlang khuami nih an duh thiamthiam lo. Zeitik hmanh ah Hmawngtlang nupa nih Leitak nupa he hmaitonh in cabuai cungah buainak kong rualrem ding ah ceihti an duh bal lo.

Cozah lei in a buainak hmun an timi hmun umtuning: Hmawngtlang nih an kan buaipi mi hmun hi Leihmun tampi a umnak a si i, a chak tlangram ah Leitak sangthar an sernak kha a si. Hi an kan buaipi nak Lungbiava in Biluikhuva kar ahhin Leihmun Ekah 80 fai a um i 98% hi Leitak Leihmun lawngte a si. Ramuk bawi Pu Mang Hnin leikuang zong, hi area ahhin a um, cucu Hmawngtlang ram ah a pek hna tihi sullam a ngei kho lo.

July 31, 2019 lio sikvelh a chuahnak:  Pu Ngun Thawng nih kum 8 chung a thuan ti lomi, ပုံစံ(၇) a um lomi a lei cu a fapa Hre Uk nih a thuan ṭhan. Hi lei chung ah ပုံစံ(၇) a ummi lawng na thuan lai i ပုံစံ(၇) a um lomi poh cu na thuang lai lo tiah အုပ္စုအုပ္ခ်ဳပ္ေရးမွဴး nih voi (2) tiang ca a pek. Nawlngai loin a thuan ṭhiamṭhiam caah July 30 ni ah Leitak (B) khuabawi nih va thlauh dingah a kal. Namtong aa va lak, ra uh, kan thah dih hna lai tiah aa hrocer caah Leitak mino nih an zuanhnawh i a tli. An dawi i an tlaih khawh, Leitak (B) khuabawi nih “Ohsuh ohchohzihmu nih ca an pekmi na hmu maw, tiah a hal i, ka hmuh ko” tiah Pu Hre Uk nih a leh. Zeiruang ah dah  ပုံစံ(၇) a um lomi na thuan, tiah a hal than tikah, Thantlang Mesazin (ေျမစာရင္းရုံး) (rianṭuantu pakhat) nih na thuan dih in ပုံစံ(၇) kan tuahpiak lai a ti caah ka thuanmi a si tiah a leh. Cun Hmawngtlang khuabawi Pu Van Biak Thawng nih a zapi (leikuang) in thuang law a herh ahcun kan in bawmh lai a ka ti, tlang a ka auhpiak i khuapi (Hmawngtlang) in an ka bawmh i, tilam tuah zong an ka bawmh, tiah a chimchih.

Hre Uk a pa Pu Ngun Thawng le a naupa le a nupi an rak phan. Hre Uk a hnarthi pawt lak in minung 20 nih an velh ti hi a dik lomi a si. A tli i an tlaihka ah minung pakhat hnih nih an benghmi lawng a si, ပုံစံ(၇) a um lomi cu thuan ti lo ding an ti i cuticun Hre Uk le a pale cu chun ah Hmawngtlang lei cu an tlung. Zanlei sml 4 hrawngah Hmawngtlang khuabawi Pu Van Biak Thawng hruainak in khuami (50) hrawng cu tilam kan tuah lai tiah Leitak an rak phan ṭhan. Cu thawngpang cu Leitak nih an theih tikah khuahnih karlak ah a herh lomi buaibainak a chuah nakhnga lo thlauh awk ah Leitak (B) khuabawi le Pastor pakhat an kal. Tilam tuah ti lo ding in an chimh len hna nain an duh lo, an tuahchih. Leitak khuami 60 tluk an kalchap i, cu ah cun ohsuh ohchozihmu le Palik zong an um ve cang. Ohsuh ohchohzihmu nih Myone Mesazin le Htwe-oh sin ah ka va hlathlai hmasa lai i tuah u, an ti ahcun nan tuah lai, tuah hlah u an ti ahcun nan tuah lai lo, tiah a remhchun, tlangtlak hna hnu zanlei sml 5:30 ah buaibainak um lo tein inn ah tlun cio a si.

Ohsuh ohchohzihmu bia ngai loin, July 31 ah Hmawngtlang khuami 150 hrawng Pu Ngun Thawng lei tuahpi ding in an rak i thawh ṭhan. Cu thawng cu Leitak khuami nih an theih tikah mino minung (16) tilamhnah ah an kal i ti an ratter kha an hmuh.  Tilam hnah an va phak tikah Ohsuh Ohchohzihmu bia an ngaih lo caah an hrawhpiak ve hna. Cu hnu tlawmpal ah Hmawngtlang minung (40) tluk an rak phan. Leitak mino Chairman kha, ziah kan tilam hi nan hrawh tiah an ti tikah atu tilam nan laknak hi kan (Leitak ram chung) tiva a si caah kan hrawh tiah a leh hna.

Cu lioah an hnulei in Hmawntlang nih Leitak cu thing le lung hmang in an rak ṭhuat hna i Leitak nih an leh ve hna. Leitak lei hma fak a tuarmi hi minung 7 an si i a dang zong an mithmai a phing cio. Hmawngtlang lei zong minung 4/5 nih hma an pu ve. Hmawngtlang cu tilam lei in an rak kir i an kir pah ah Leitak inndong (35) nih an din ei liomi ti pipe cu an tan dih hlei ah Leitak khua luh laite “Donnak Catar (Signboard)” zong an khuai, an hrawhchih dih. Signboard an hrawh hi a voi 4nak a si cang.

Bia kilhnak: Hihi Leitak le Hmawngtlang kan tuanbia dik le 2016 in aa thawk i July 31 tiang kan buainak a si. Kan sining dik cu kan pu Mang Hnin chan in Leitak le Hmawngtlang khuami hna cu Leitak ram chungah kum 70 leng khua kan sati cang. Pathian nih Leitak ram hmang in a kan cawmmi kan si. Hihi aho hmanh nih al khawh lomi kan tuanbia, kan sining a si.

Leitak Khuapi

Latest News