/

Leipi Khua ah Ramvai Tti Meithal in an i Kap Sual

The Chin Journal | Hakha | Chin State
Meithal in kah sual a tongmi Pu Suh Aung

Senthang peng, Leipi khua ah ram a vai ttimi karlak ah meithal in i kah sualnak a chuah caah kah sual a tongmi pa cu Hakha sizung ah nihin ah an phakpi, tiah thawng kan theih.

Nizan zanlei sml. 6:00 hrawng ah khan Leipi le Lungkhin khua karlak, Leipi in meng 3 hranwg a hlatnak hmun ah Pu Suh Aung (kum 32) le Pu Thanwg Zung Thang telh in minung 4 cu ram an vai.

Ram an vaihnak ah Pu Thanwg Zung Thang nih Pu Suh Aung cu a kah sual. Pu Aung Soe cu amah tein a hliamhma he motorcycle aa cit i Leipi khua ah an vung tlung.

Pu Suh Aung le Pu Thawng Zung Thang hi naihniam cingla-rualchan an si i, facang aah ding in Lei an riah pah ah ram an vai i, atu bantuk in vanchiatnak a chuah sual hi a si.

Hakha palik sakhaan ttuanvo ngeitu palik pakhat nih, “Kah a tongmi hi Pu Suh Aung a si. A kaptu hi Pu Thawng Zung Thang a si i, kah a tongmi a nupi Pi Khin Vang nih case a on. Pu Thawng Zung Thang nih Pu Suh Aung hi a kenglei ah a kah sual. Atu cu Pu Suh Aung cu lungfim in a um cang,” tiah The Chin Journal sin ah a chim.

Meithal in kah sual a tongmi Pu Suh Aung hi Lungkhin khuami a si i, Leipi ah nupi a ngei. Leipi khua ah cun a nupi le an fale pahnih he khua a sami an si.

Meithal in i kah sualnak kong he pehtlai hin Surkhua palik sakhaan ah case on a si i, thil sining fiang in theih awkah palik nih hlathlainak an tuah cuahmah lio a si.

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19