, /

Lamzawhtu Hnahnawhnak ah “Ma Ba Ta” Kutneh a Lang

The Chin Journal | Hakha | Chin State

Myanmar ralkap nih uknak a laknak ni 18 a hun tlin bang in Yangon khuachung i ralkap uknak duhlo lamzawhtu hna hnahnawhnak a petu hna lak ah Ma Ba Ta minung pawl an i telmi theih an hun si.

Ma Ba Ta cu Kawl phun ttanh bu ti in Laiholh in cun a fiannak bik in theih a si i, Mirang holh in cun “Patriotic Association of Myanmar” tiah theih an si.

Ma Ba Ta cu ralkap le USDP nih a kalpi ning deuh in rian a ttuanmi an si i, Rohingya pawl thahnawnnak kong zong ah hrihawhtu bik an si tiah sual an phawt hna.


Cu lawng si loin NLD cozah chan ah miphun dang le biaknak dang karlak ah buaibainak chuahpi ding in phungchimnak/hrihawhnak pawl an tuah zungzal ruang ah 2017 ah Ma Ba Ta cu phungning lo bu a si, tiah an ti i an bu hrawhter a rak si.

Asinain, a rauh hlan ah Buddha Dhamma Charity Foundation timi zatlang mibawmtu minkeng in an dir tthan. Cu bu zong cu NLD cozah nih phungning lo bu tiah a ti i, a hrawhter tthan hna.

February 18 ah Yangon khua, Bahan peng i Shwe Dagon nichuahlei kutka hmai i motor lampi ah phungki cheukhat nih lamzawhtu pawl motor thirfung in an den.


Hi motor a dengtu pawl lak ah hin ralkap cozah a dirkamhtu Ma Ba Ta chungtel pawl an i tel, tiah Irrawaddy nih a ttial.

Mi an tlawm deuh caan ah lamzawhtu pawl motor an denpiak hna i, mipi an rak chuah lecangka in phungki innchung ah an vung zaam.

Ma Ba Ta minung pawl phungki innchung ah an i thuh caah mipi nih phungki inn luh hnawh ding in an kal hnawh.

Asinain, phungki innchung lei in chai in an rak cheih hna i hliamhma a pumi minung pathum an um.

Nihin zanlei muilai ah buaibainak a hun fah chinchin caah palik pawl an rak chuak i phungki inn cu ahohmanh lut kho lo ding in an congh.

Ma Ba Ta chungtel pawl nih lamzawhtu pawl an tuk hna ruang le chai in an cheih hna ruang ah minung pali hliamhma an pu.

Myanmar ram tuanbia ah mipi buaibainak a chuah tik ah mibu tthentthek ding in misual bu pakhat ralkap nih a rak hman tawn.

Cu bu cu Laiholh cun “Banrek Sen” (လက်ပတ်နီ) tiah theih an si i, an baan/an lu ah asen muici puan an i ttem hna.

March 2015 ah a rak cangmi Myanmar siangngakchia lamzawhnak ah hi Banrek Sen misual bu hi siangngakchia pawl tukvelh ding in an rak thlah hna.


Palik he i bawm in siangngakchia pawl cu ruru hranghrang in an rak tukvelh hna.

Cun, May 30, 2003 ah Sagaing ramtthen, De Payin khua pawng ah a cangmi NLD chungtel pawl thahnawnnak zong ah hi Banrek Sen pawl hi an rak hman hna.

Daw Aung San Suh Kyi telh in NLD upa pawl De Payin lei an kal lio ah Banrek Sen misual bu pawl nih lam an kham i NLD chungtel pawl cu thingtan le tanbo he an rak den hna.

Hi lio ah hin a tlawm bik NLD minung 70 an nunnak a liam tiah an ruahdamh i, Daw Suh hi a motor mongtu nih a zaampi khawh manh caah nunhim in a um.

Hi Banrek Sen misual bu hi ralkap nih a dirkamhmi bu an si tiah zapi nih theih a si i, 2015 ah khan ahnu bik an i langh.

Asinain, Kawl phunttanh Ma Ba Ta a chuah hnu in hi Banrek Sen misual bu hi a tlau. Cucaah, Banrek Sen misual bu hi Ma Ba Ta ah i fonh (asiloah) min i thlen in cawlcang sehlaw a dawh tiah ruahnak zong a um.

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.