Lailenpi Vanlawng Ground Saknak Rian Thok Ding in Onnak an Tuah

| The Chin Journal | Hakha, Chin State

Chin ramkulh a pahnihnak vanlawng ground cu Matupi peng, Lailenpi ah sak ding in May 4 ah onnak puai an tuah, tiah theih a si.

Lailenpi vanlawng ground cu Mission Aviation Fellowship (MIF) nih Lailenpi khua he meng 1 a hlatnak tlaang cung ah an sak i 2020 ah cun minung 20 a tlummi vanlawng tum kho ding in timhtuah a si.

Lailenpi khua cu India le Myanmar ramri ah a ummi a si i, Yangon lei kal tikah ni 5 a rau nain vanlawng in cun suimilam pakhat le cheu lawng a rau lai, tiah vanlawng ground saknak haotu Dr. Sa Sa nih a chim.

Lailenpi vanlawng ground cu a sau pe 3,000 le a kauh pe 150 in sak ding ti a si i, $2.2 million a dih lai tiah ruahdamh a si.

Vanlawng ground saknak ah a dihmi vialte zong hi MIF nih a khaanmi a si i Chin ramkulh cozah budget aa tel lo, tiah Chin ramkulh vuancichoh Salai Lian Luai nih a chim.

2017 ah khan Lailenpi vanlawng ground sak ding in Department of Civil Aviation nih a rak hnatlakpimi hna a si.

Vanlawng ground a satu MIF hi amiak ruah in rian a tuanmi bu si loin lamhlat hmunram khuasa hna nih thanchonak an hmuh nakhnga bawmhnak a petu bu a si.

Hi Lailenpi vanlawng ground an sakmi MIF nih a lim dih tik zong ah Department of Civil Aviation sin ah a ap lai, tiah theih a si.

-Zalen

Latest News