Kum 19 Siangngakchia Nu Palik nih kan Kahmi Si Lo an Ti

| The Chin Journal | Hakha, Chin State

Mandalay lamzawhnak ah meithal in a lu ah kah a tongmi kum 19 University Siangngakchia nute Ma Kya Sin cu kanmah nih kan kahmi a si lo, tiah palik nih an el.

March 3 i Mandalay lamzawhnak ah Ma Kya Sin cu meithal kuanfang nih a lu ah a khen i a nunnak a liam.

Ma Kya Sin meithal kah a tonmi nih vawleicungpi a tlirh i Hollywood lemcang minthang cheukhat tiang nih an ngaihchiatnak an langhter.

Vawleipi tlirh in Ma Kya Sin thihnak thawngpang a than tik ah March 5 zaan ah palik nih Ma Kya Sin ruak an hlai i checknak an tuah.

March 6 zanlei MRTV le MWD ah “Ma Kya Sin lu cung i kuanfang hi palik nih lamzawhtu tthenhmalnak ah kan hmanmi meithal kuan a si lo,” tiah an chim.

Kehlei kuan khi palik hmanmi si an ti i, Orhlei hi Ma Kya Sin a khennak kuan an ti. (MWD)

Ma Kya Sin meithal in kah a ton ni March 3 ah hin Myanmar ram ah minung 38 ralkap le palik kut in an nunnak a liam i, Myanmar ralkap nih uknak a chuh hnu ah thisen le nunnak tam bik a liam ni a si.

Atu tiang ah Myanmar lamzawhnak ah minung 54 an nunnak a liam cang tiah UN nih cun thawng a thanh nain Myanmar ram lamzawhtu a nunnak a liammi cazin a khawmsuattu Heroes of Myanmar bu nih cun minung 60 leng an nunnak a liam cang, tiah a langhter.

Cherhchan: BBC, DVB

Latest News

News in Burmese