‘Khuami Hna an Tangka le Suingun an Lakpiak Hna’ Timi Thawngpang hi a Dikhmaan Lo Tiah Kawl Ralkap nih an i Pheh

| The Chin Journal | Hakha, Chin State

Rakhine ram, Yatehtaung pengkulh, Ta-mi-hla khuate kiangkap ah AA le Kawl ralkap kahdohnak a chuak lio i Kawl ralkap nih Ta-mi-hla khuami hna an tangka le suingun hlawnthil pawl an lakpiak hna tiin thawngpang a lengmi hi a dik lomi a si tiah ralkap lei in bohmu-chauk Zaw Min Htun nih a chim.

Jan. 26 ah Ta-mi-hla khuate ah ralhriam ngan pawl a hun tla. Kawl ralkap nih cun inn khat hnu in khat an lut i kawlhawlnak an tuah. Cu lio ah cun khuami hna i kan tangka, suingun le thilri pawl an kan lakpiak tiah Ta-mi-hla khuami nih an chim.

Tangka Ks. Sing 27 le Hni (Lunggyi) firpiak a tongmi U Maung Thein Nu nih; “Ka tangka Ks. Sing 27 (2,700,000) an ka lakpiak. Hi tangka hi thingkuang chung ka chiahmi a si. Ka thingkuang an bauh hnu ah an lak. Lunggyi 3 zong an lak. Khuami kan zapi in sianginn ah kan i bu hna, cu lio ah cun inn khat hnu inn khat an lut i kawlhawlnak an tuah. Inn ka hun tin ah cun ka tangka cu a um ti lo” tiah a chim.

Cu bantuk thiamthiam in U Aung Saw nih; “Ka inn thlalangawng an awn i an lut. Thingkuang le a dangdang an awn i an kawlhawl, ka ihkhun tang i ka chiahmi tangka Ks. 80,000 an lak. Cun, sui kutdonghrolh pakhat le ngun tangka fang 1 an lak. Midang ta zong tampi a tlau” tiah a chim.

Kawlhawlnak an tuah lio ah hin kalnak nawl an kan onh lo. Khua i a ummi palik sin ah report kan tuah. Palik zong khuachung ah an um ve ko. ‘Kannih nih zeihmanh kan hngal lo’ tiah palik nih cun an kan ti tiah U Aung Saw nih cun a chim chap.

U Than Maung Htun i a ngeihmi sui, a rih/zan 6 Ks a simi zong a tlau. “Thingkuang chung ka chiahmi sui 6Ks an ka lakpiak.  Thingkuang tawh an boh, sui 6Ks, thi-pum hrual 2, baan-hrolh 10, tumbul kapkhat lei, kutdonghrolh 1, tangka Ks. 200,000 le Handphone 3 an lak” tiah a chim.

Hi kong he pehtlai in Yatehtaung pengkulh hluttaw palai U Oo Than Naing nih thilri a tlaumi inndawng cazin pawl a lak i inn 64 an i tel. Ralkap lutlai hna sin ah report ka tuah lai tiah U Oo Than Naing nih a chim.

DVB

Latest News