Khualtlawng an Tlawm Tuk Caah Hakha Car Gate Cheukhat an Khar Chung

| The Chin Journal | Hakha, Chin State

COVID-19 caan chung Hakha in Kawlrawn lei a panhmi khualtlawng an zor tuk caah Hakha Car Gate cheukhat an khar, tiah thawng kan theih.

Hakha in Kawlrawn lei ah a kalmi Swe Lwin Pyin Car Gate le Mingalar Car Gate hi a khar chungmi an si i, a dang Car Gate pawl zong Kawlran lei khualtlawng an tlawm caah motor chuah caan ahlan ningkel in an kal kho ti lo.

High Class Car Gate haotu Pu Ceu Luai nih, “September 11 thawk khan Yangon-Hakha hi kan kal ngam ti lo. Cun, September 12 thawk khan Hakha-Yangon zong kan chuak ngam ti lo. Hakha-Yangon cu khualtlawng an um lo caah motor a lawng in a kal. Yangon-Hakha belte hi kan duhherhmi a tlamtlin nakhnga a sung in kan kal tawn,” tiah a chim.

Taungzalet Car Gate cazi Kawi Biak nih, “Mandalay lei cu September 11 in kan chuak ti lo. Asinain, Thantlang, Hnaring, Kalay le Falam hi cu khualtlawng an um cun kan chuak k0. Khualtlawng an um lo tuk i zarh khat voi khat hmanh hi kan chuak kho ti lo,” tiah a chim.

Chin Taung Taan Car Gate haotu Aung Aung nih, “Khualtlawng an zor tuk i kan chuak kho ti lo. Thilphortu motor lawnglawng hi zarh khat ah voi 2 asiloah voi 3 hrawng kan kal kho i, Thantlang hi Thantlang hi a caancaan ah thil phorh in kan kal,” tiah a langhter.

Aye Chian Car Gate cazi Mawi Mawi nih, “September dih tiang cu minung kan phor ti lai lo. Thil phortu motor belte cu zarh khat ah voi 2 asiloah voi 3 cu kan kal peng ko lai. Duherhmi cah khawh peng kan si ko,” tiah a chim.

Hakha Maan Car Gate ttuanvo ngeitu Lily Aye nih, “Yangon-Mandalay cu thil phorh ding ah zarh khat voi 2 asiloah voi 3 cu kan kal peng rih ko. Cun, kan Gate hi kan on peng rih ko lai,” tiah a chim ve.

COVID-19 zawtnak Myanmar ram ah a hun zual hnu ah atu bantuk in Chinram le Kawlrawn lei khualtlawnnak rian a hun hnorsuan hi a si.

Latest News

News in Burmese