, /

Khrihfa (17) Zaan an Ih Lio ah Mibu Pakhat nih an Rak Thah Hna

The Chin Journal | Hakha | Chin State

Nigeria ram, Kajuru peng ah Khrihfa (17) cu zaanttim ah mibu pakhat nih vainam in an luh hnawh hna i an thah dih hna, tiah The Christian Post nih a langhter.

May 12 zaanttim sml. 11:30 hrawng ah khan Nigeria ram Kaduna-Kachia lamkam ah a ummi Gonan Rogo khuate ah mibu pakhat vainam he an lut i inn khat hnu inn khat lut in mi an thah hna.

Ahmasa bik an luhnak inn hi Jonathan Yakubu tiah auhmi pa inn a si. Jonathan cu vainam in a thah hnu ah a nupi le a fale pathum zong an thah hna.

Thah a tong vemi Jonathan fale pathum hi kum 13, kum 6 le kum 4 telawng an si rih.

Jonathan te chungkhar an thah dih hna in a dang inn ah an lut tthan i Kauna Magaji le a fanu Faith Magaji zong an thah hna.

“Inn khat hnu inn khat an lut i minung 17 an thah hna. Mithattu pawl hi sattial khalh in a bu in aa chok tawnmi Fulani miphun an si,” tiah National Public Relations Officer a simi Luka Binniyat nih a chim.

Fulani pawl nih thla (3) nauno a ngeimi hringtu nu Saraunia Lucky (kum 25) zong an thah ve. Asinain, a fate cu thahnawnnak in a luat i Albarka Baptist Church nih an zohkhenh.

Thah a tongmi Khrihfa (17) i an ruak cu May 13 ah khuami nih an zapi in an vui tti hna, tiah theih a si.

Cherhchan: The Christian Post

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.