Keith Thurman: Manny Pacquiao Hi Champion Taktak Cu a Si Ko

| The Chin Journal | Hakha, Chin State

Myanmar caan in July 21, zinglei sml. 10:30 ah US ram, Las Vegas ah tuahmi atulio vawleicung boxing champion pahnih Keith Thurman le Manny Pacquiao puai ah Split Decision in Pacquaio nih teinak a hmu.

Voi khat hmanh a sung rih lomi Thurman cu a Round 1nk ah Pacquiao nih tlu lak in a thongh khawh.

Puai an rak tuah hlan ah khan Thurman nih, “Pacquiao hi boxing tual in ka dinhter cang lai,” tiah a rak i hrocer ngaingai.

Micheukhat zong nih, “Pacquaio hi kum 40 minung a si cang i a thawn lingcing a simi kum 30 Thurman hi a tei kho lai lo,” tiah an rak ruahdamh ve.

Sihmanhsehlaw, an hun i thongh taktak tikah Champion pakhat a si vemi Thurman nih Pacquiao cu aa khingkhang ngaingai in a thong kho lo.

Thurman le Pacquiao an i thongh dih hnu ah Fox Sports nih Cartoon a suimi ah Thurman nih Board cung ah, “Pacquiao hi tuan ah aa din rih lai lo,” tiah ca a tialmi an langhter i, Pacquiao cu Prof. Manny tiah upatnak an pekmi hmuh khawh a si.

Round 12 chung ah Round 6,7,9 lawng ah Thurman in tlawmpal a namneh deuh. Sihmanhsehlaw, a dang Round vialte ah Pacquiao nih a khulran ning le boxing tongh ningcang a thim ning langhter in Thurman cu a detkhawt ngaingai.

Puai a dih hnu ah Thurman nih, “Pacquaio hi Champion taktak cu a si ko. Amah he aa khingkhang in i thong kho ninglaw ti ka duh tuk nain ka ti kho lo. Hmailei ah amah he i thongh than ka duh ko. Atutan puai hi ka ca ah cun cawnpiaknak tha a si kho,” tiah a chim.

Pacquiao zong nih, “Puai tha ngai a si tiah ka ruah ko. Thurman zong boxing thongh a thiam taktak. A thawng fawn. A thiamnak dihlak chuah in aa thongh tiah ka ruah, kei zong ka thiamnak dihlak ka hman ve. Tu zan kan i thonghmi puai nih mipi lung a lawmhter lai tiah ka ruah ko,” tiah a chim.

Thurman nih, “Round 1nk ah tlu lak in a ka thongh khawh ca ah mark a hmu khun. Amah he i khingkhang deuh in vun i phomh kho ning ti ka duh. Sihmanhsehlaw, Pacquiao hnu ah ka rak i thlai deuh ko,” tiah a sunghnak cu lunglawm tein a cohlan ve.

Latest News