/

Kawlram Thimnak Result Kong ah USDP nih Dohdalnak Ca an Tial Lai

The Chin Journal | Hakha | Chin State

Atutan Kawlram rampi thimnak ah dinfel lonak tete a um tiah USDP nih an ti caah upadi he aa tlak in chimphoih awk ah Union Election Commission (UEC) sin ah cattial an timh, tiah theih a si.

UEC nih phungning in teitu result azapi in a thanh rih lo nain ramchung mekuang kip vote an rel tik ah 2015 nakin atu 2020 ah NLD nih teinak ngan chinchin hmuh dawh in a um.

Abiana ah, USDP khua 4 ti tiang in min an pekmi Meiktila district chung khau pali ah NLD nih an tei dih hna.

Cun, USDP Head Quarter a umnak Naypyidaw, Dakhina Thiri peng zong ah NLD nih bual a co thotho. A cunglei hmun pawl hi 2015 lio ah USDP nih an rak tei dihnak an si.

USDP Chairman U Tann Htay nih, “Atutan vote thlak ningcang a dihdongh ning vialte hi upadi he aa tlak le tlak lo tuaktak awk tete an um len. Tehte pawl zong an hun langh thluahmah lio a si i, atutan thil sining hi caan sau zong a rau kho. Cucaah, upadi ning tein tuahmi Myanmar thimnak hi upadi he aa tlak taktak nakhnga pehzul in kan i zuam lai,” tiah a chim.

Atu bantuk in USDP lei nih upadi he aa kalhmi tete thimnak ah a um an ti nain atu tiang ah cun tehte fekfuan in an langhtermi a um rih lo.

Atutan Myanmar ram thimnak Result kong he pehtlai in NLD nih an tuahmi Dashboard ning ah cun Pyituh Hluttaw ah hmun 242 le Amyotha Hluttaw ah hmun 119 cu NLD nih an lak cang.

[Cherhchan: Frontier Myanmar, Eleven]

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19