Kawlram ah Ralkap Uk Duhlo Cawlcanghnak aa Thawk Cang

| The Chin Journal | Hakha, Chin State

Ralkap nih uknak a lak hnu ni tlawmpal ah Yangon le Mandalay ah ralkap uk duhlonak mipi cawlcanghnak aa thawk cang.

Kawlrammi kan dai sawh ti lo. 8888 Generation hruaitu Ko Min Ko Naing le Ko Jimmy tibantuk nih “Ralkap uknak cohlan hrimhrim hna hlah u sih, 2021 mipi cawlcanghnak tuah hram kan thawk cang,” tiah online forhfialnak ca an ttial.

2021 ralkap uknak duhlo mipi cawlcanghnak cu phun 4 in tuah a si lai:

  1. Kawlram cozah rianttuantu hna nih ralkap uk duhlo cawlcanghnak an tuahmi dirkamh ding.
  2. Ralkap kut tang ah cozah rianttuan duh loin rian aa dinmi pawl kha kan umnak sang le veng cio nih an herhbaumi zohkhenh le bawmhchanh ding.
  3. Zaan sml. 8:00 paoh ah ralkap uk duhlonak langhternak ca ah umkheeng den/tum ding.
  4. Daw Aung San Suh Kyi le President Win Myint an luat nakhgna thlacampiak ding ti hna hi an si.

Myanmar ramkomh a dirhtu lak ah aa telmi Chin miphun hna zong nih ralkap uknak hi duhlonak a tuahtu cozah zung rianttuan pawl hi dirkamh hna u sih.

Zung kai lo ruang ah harsatnak a tongmi cozah rianttuantu pawl hi sang le veng kip, chungkhar kip nih bawmhchanh le zohkhenh i zuam ve hna u sih.

Myanmar ramchung ngandamnak lei rianttuantu tampi zung kai ti loin an um. Sianginn saya/mate zong Civil Disobedience Movement ah tel hram an i thawk cang.

Nihin zinglei ah Hluttaw palai 70 nih ralkap cozah an duh lo ruang ah le an cohlang lo ruang ah Hluttaw auh an thawk cang. “Kan ram caah kan rian kan tlamtlinh hrim lai” tiah misen zong an thut cang.

Latest News

News in Burmese