Kawlram ah Coronavirus Mizaw Tiah Lunghrinhmi (21) an Um

| The Chin Journal | Hakha, Chin State

Myanmar ramchung ah Coronavirus a phanh taktak le phanh taktak lo acozah lei nih an fehter rih lo nain atu February 14 tiang ah rampumpi huap in Coronavirus mizaw tiah lunghrinh in an zohkhenhmi hna minung (21) an um, tiah Myanmar ram ngandamnak vuanci zungpi nih thawng a thanh.

Cu minung (21) lak ah Mandalay ramtthen ah a ummi minung pahnih le Shan ramkulh ah a ummi minung pakhat hi Tuluk ram in a rak tlungmi an si hna i, an khaak le an cil pawl ttha tein checknak tuah hnu ah zei zawtnak in an zawt timi a fiang lai, tiah ngamdannak zung thawngthanhnak ah an langhter.

Tuluk ram Wuhan khua in aa thawkmi Coronavirus ruang ah Tuluk ram ah minung 1,300 leng an nunnak a liam cang i, minung 50,000 leng an i chawn.

Sihmanhselaw, Kawlram ah cun hi Coronavirus hi a phak le phak lo an fehter kho rih lo.

Laimi tampi kan um venak Singapore zong ah Coronavirus a phan ve cang i, atu tiang ah minung 60 leng an i chawn. Singapore mizaw chung ah minung 17 cu damnak an hmu tthan i sizung zong in an ttum kho cang.

Myanmar ram zong ah Coronavirus a tlung sual lai tiin ramri kip ah ttha tein checknak an tuah i, Myanmar cozah nih ralrin ah Coronavirus dohnak ca ah budget ting 3,000 zong a chiah chung cang, tiah theih a si.

Cherhchan: Ministry of Health and Sports, MCN TV News

Latest News

News in Burmese