Kawl Ralkap Thla (3) Kah Ngolmi ah Chinram le Rakhine Hmun Cheukhat an i Tel Lo

| The Chin Journal | Hakha, Chin State

May 10 in August 31 tiang, thla (3) chung Kawl ralkap nih kahdohnak kan ngol an ti nain cu chung ah cun Chin ramkulh chung le Rakhine ramkulh chung hmun cheukhat an i tel lo, tiah theih a si.

COVID-19 zawtnak pulrai a um bang in UN nih vawleicung hmun kip ah khadohnak ngol i COVID-19 zawtnak tu doh ding in thawng a thanh bang in Kawl ralkap zong nih zawtnak dohnak lei ah ttanlak ding in thla (3) chung kahdohnak kan ngol, tiah thawng an hun thanh hi a si.

Sihmanhsehlaw, kahdohnak ngol caan thla (3) chung ah Myanmar cozah nih ralhrang bu tiah a timi pawl an i tel lo.

Cozah nih phungning in ralhrang bu tiah a timi ARSA ralhrang bu le AA hriamtlai hi Kawl ralkap thla (3) chung kahdaihnak nih a huap hna lo bang in hi hriamtlai pawl an cawlcanghnak Chin ramkulh, Paletwa peng le Rakhine ramkulh chung hmun cheukhat zong ah kahdohnak ngol a um lo.

Cun, hi thla (3) chung ah hin tlangcungmi hriamtlai bu khat le bu khat karlak kahdohnak tuah lo ding le kahdaihnak caan hi mah hriamtlai hlawknak hmuhnak ca ah ningcang loin hman lo ding, tiah Kawl ralkap nih May 9 ah a chuahmi thla (3) chung kahdaihnak cathanh ah an telh chih.

Latest News

News in Burmese