Kawl Ralkap Soisel Ruang ah Tazacuaimi Pa Kum 1 Thong an Thlak

| The Chin Journal | Hakha, Chin State

Kawl ralkap soisel in bia a chimmi ruang ah ralkap nih pohma 505 (a) in taza an cuaimi U Nay Myo Zin cu nihin ah rianhrang he kum khat thongthlak ding in Yangon ramthen, Teik Gyi peng biaceih zung nih dan a tat, tiah theih a si.

Thongthlak a tongmi U Nay Myo Zin nih, “Saya Min Htin Ko Ko Gyi kum khat thong dantatnak an pek ah khan kei zong kum khat thong an ka thlak lai ti hi ka rak theih cia ko. Kan ram nih adikmi zalennak ngaingai kan hmu rih lo. Zalong tein chimrelnak nawl zong a um lo. Lungrawk khun a simi cu Democracy cozah chan a si nain zalong tein chimrelnak a um lo caah tlaihkhih kan ton zungzalmi hi a si,” tiah a chim.

April 1, 2019 ah Teik Gyi peng, Apyouh khua ah tuahmi 2008 Phunghrampi remh duhnak langhternak puai ah U Nay Myo Zin nih Kawl ralkap limhaang chiatchuahnak le mipi lampialter ding in a forhfial hna tiah sual an phawt i, Kawl ralbawi Lt. Col Toe Lin nih taza a cuai hi a si.

Kawl ralkap limhaang chiatchuahnak timi sualphawtnak thotho in naite ah khan Director Min Htin Ko Ko Gyi zong kum khat thongdan an rak pek cang.

Latest News