Kawl Ralkap Nih Rakhine Khuate Pakhat a Ning in an Lak

| The Chin Journal | Hakha, Chin State

Nizan September 4 ah khan Rakhine ramkulh ah Kawl ralkap nih khuate pakhat a ning in an lak, tiah theih a si.

Myanmar ram tlangcung hmunram tampi ral a tho nain atu bantuk in khua pakhat ning in Kawl ralkap kut tang ah chiah timi hi a um lemlo.

Atutan an lakmi khua hi Butidaung peng, Uh-Yin-Thar khuate a si i, hi khua hi AA nih hmunkhuarnak ah an hman an ti ruang ah Kawl ralkap nih a khua ning in an lak hi a si.

“Uh-Yin-Thar” khua ah a ummi pawl AA hi ni zeizah dah kan doh hna timi cu khuami zong nih an theih ko. Hi khua ah hin AA pawl hmun an khuarnak ni 3 hrawng an si cang. Nihin zanlei sml. 4:00 lawng ah kan lak khawh,” tiah Kawl ralbawi Major Win Zaw Oo nih a chim.

Kawl ralkap nih an lakmi Oh-Yin-Thar khuate hi inn 53 khuasa an si i July thla thawk khan khuachung le khua kiangkap ah AA le Kawl ralkap kahdohnak a um cang.

AA chimnak nawlngei Khaing Thu Kha nih, “Hi khua hi AA hmunkhurnak a si tiah Kawl ralkap nih an timi hi hrihhram ngei lo a si. Mah khua zong ah kan lut lo. Nizan ah kha khua zong ah khan kahdohnak a um lo. Khuachung ah Kawl ralkap pawl an lut i inn pawl mei in an khangh,” tiah a chim.

Oh-Yin-Thar khuate chung Kawl ralkap an luh hnu ah khuachung inn pawl an kaang len.

Rakhine MP U Aung Taung Swe nih, “Kawl ralkap Oh-Yin-Thar khuate ah an lut i mei an khangh tiah khuami nih thawng a kan thanh. Mah khua ah khan minung an um lo,” tiah a chim.

Oh-Yin-Thar khuate ah July thla ah Kawl ralkap le AA an rak i kah lio ah khuami hna cu an zaam dih cang i September 4, hi thil a can ah hin khuami an um ti lo, tiah theih a si.

-Irrawaddy

Latest News