Kawl Ralkap nih Mah le Mah Hngal Lo Tiang in an Velhmi Pa Yangon Siizung ah Camipuai a Phi Kho

| The Chin Journal | Hakha, Chin State

Rakhine ram, Kyauk-daw khua ah Kawl ralkap nih mah le mah hngal lo tiang in an velhmi tanghra siangngakchia pa cu a hun dam deuh cang caah nihin i tuahmi tanghra camipuai ningcang tein a phi kho.

Velh a tongmi Mg Zaw Naing Naing Htey cu Kyauk-daw siizung ah an thlopbul nain dam lei a panh hlei lo ruang ah Yangon ramthen, North Okkalapa siizung ah an thlopbul.

“Amah le mah aa hun hngalh caan a um nain tihphannak a ngei zungzal. Tutan tanghra camipuai zong phit khawh dawh a si lo” tiah hringtu a pa U Shwe Sein Oo nih aluancia caan tlawmpal ah khan a chim bal.

Sihmanhsehlaw, Mg Zaw Naing Naing Htey cu Yangon siizung an lanhpi hnu in dam lei a hun panh deuh caah nihin i thokmi tanghra camipuai zong ningcang in a phi kho.

Feb. 21 ah Kyauk-daw khuami Mg Zaw Naing Naing Htey cu mawtaw cycle datsii rawnnak in inn a ttin lei ralkap zung hmai a phanh ah ralkap nih an tlaih i cei cikcek in an velh. Inn a rak tin ah cun lungfim lo in a um cang.

Hi kong ah U Shwe Sein Oo nih Kyauk-daw palik sakhan ah case a on. Asinain, ralkap lei thawng dikhmaan thanhtu phu in General Zaw Min Htun nih ‘Zaw Naing Naing Htey hi ralkap nih tlaihmi a si lo” tiah Media ah a chim.

Hringtu a pa lila ralkap nih taza an cuai ve i kaphnih in taza an i cuai hna.

– Narinjara

Latest News