Kawl Ralkap nih an Tlaihmi Chin Pa Kong ah Hringtu a Nu nih Human Rights Commission ah Report a Tuah

| The Chin Journal | Hakha, Chin State

Chin ramkulh, Paletwa peng Shin-latt-wa khua ah Daw Tin Aye i a fapa Mg Zaw Min Htike (kum 25) cu aluancia caan tlawmpal lio ah Kawl ralkap nih an rak tlaih i a thawngpang an theih lonak ni 50 leng a si cang tiah Narinjara thawngzmah nih a langhter.

“Ka fapa cu aluancia Jan. 21 ah Shin-latt-wa khua ralkap sakhan tuanvo ngeitu nih an rak tlaih. Kanmah he tonnak nawl an kan pe lo, Paletwa peng palik sakhan ah report kan tuah ko nain sakhan ah an rak ap hlei lo. Atu ah hin chungkhar hna thinphang in kan um ko” tiah Daw Tin Aye nih a chim.

Nikhat nu nikhat in a caan a luan chin lengmang cang. An tlaih hnu ah palik sakhan ah an rak ap than lomi hi nuhrin covo an buar a si. A hnu ah cun zei ti tuah awk hngal loin, Myanmar National Human Rights Commission ah report ca ka tial hi a si tiah a chim.

Mg Zaw Min Htike a tlaitu hi Captain Hein Htet Aung a si. An tlaih hnu ah tazacuai loin nihin tiang an hrenmi hi phungning loin tlaihkhih a si. Mg Zaw Min Htike le khuami 2 zong an tlaih chih hna timi kong pawl report ca chung ah aa tel.

Report catial cu Myanmar ram ralkap zungpi le ILO sin ah xerox an pek chih hna tiah theih a si.

Latest News