Kawl Ralkap Helicopter le Vanlawng Kahnak in Ni (25) Chung ah Chinmi (28) an Thi

| The Chin Journal | Hakha, Chin State

Chin ramkulh chung AA le Kawl ralkap kahdohnak Kawl ralkap lei nih Fighter vanlawng le Helicopter an hman ruang ah ni (25) chung ah Chinmi minung (28) an nunnak a liam.

March 14 le 14 ah Paletwa peng, Maiksawa khua, Watma khua le Piangtin khua ah Kawl ralkap nih Fighter vanlawng in AA an kah hna i khuami 21 an nunnak a liam pin ah minung 28 hliamhma an pu.

Cun, nizan April 7 ah Paletwa peng chung thotho Nanchaungwa khuate ah Kawl ralkap nih Helicopter in bomb an kah i khuami minung (7) hmakhatte ah a nunnak a liam i, a dang minung (8) hliamhma an pu hna.

Ni (25) chung ah minung (28) an thih caah ni khat ah minung pakhat nak tam Kawl ralkap vanlawng le helicopter kahnak in an nunnak a liam tinak a si.

Kawl ralkap kahnak ruang ah a nunnak a liammi chungkhar pawl hi Kawl ralkap nih liamrulhnak an pek hna a herh, tiah Chin Human Rights Organization le CNLD nih an langhter.

“Kawl ralkap lei nih a tlawm bik an tuah khawhmi cu a nunnak a liammi chungkhar hna sin ah tangka lei in liamrulhnak pek hi a si. Liamrulhnak hmanh an tuah duh lomi hi a thimi chungkhar hna cung ah cohlan awk a ttha lomi sualtuahnak phun khat a si…” tiah CHRO Deputy Executive Director Salai Za Uk Ling nih a chim.

CNLD Secretary Salai Ceu Bik Thawng nih, “Hihi cu Kawl ralkap nih ningcang lo daithlang in an tuahmi bak a si ko. Cucaah, thihlohnak a tongmi chungkhar hna hi an nawl hna i liamrulhnak an pek hna awk a si. Liamrulhnak pek ding in (CNLD nih) kan hal nain zei hmanh an tuah lo pin ah ningcang loin hmainor in rian an ttuan chinchin,” tiah a chim.

AA le Kawl ralkap karlak Chin ramkulh chung kahdohnak ah kap hnih lei nih Chin miphun cung ah ralram sualnak an buarmi a um len, tiah Salai Ceu Bik Thawng nih a chim chap.

“Biatak ti ko ahcun AA le Kawl ralkap nih Chin ramchung ah ralram sualtuahnak (War Crimes) an buar. Geneva Convention le International Law an buar. An thiltuah ning hi ralhrang cawlcanghnak bantuk a si cang…UN zong nih thawng a thanh bang in COVID-19 caan chung a si i, kap hnih nih ral ngol ding a si…” tiah a chim.

Kawl ralkap le AA kahdohnak ruang ah March thla chung ah khan minung 3000 hrawng Sami khua ah an rak zaam i, nizan Nanchawngwa khua i Kawl ralkap nih Helicopter in bomb a kah hnu zong ah khuami pawl Paletwa khua ah an zaam hna, tiah theih a si.

Latest News

News in Burmese