Kawl Ralbawi Nih Thailand Tonginn ah Win Le Zaw a Vung Veh Hna

| The Chin Journal | Hakha, Chin State

Thihdan pekmi Win le Zaw cu Thailand ram, Bang Kwang Central Prison timi thonginn ah Kawl ralbawi Gen. Mya Tun Oo nih September 3 ah a vung vehvat hna, tiah theih a si.

Gen. Mya Tun Oo nih Win le Zaw cu thazaang peknak bia a ruah hna i, “Thai siangpahrang sin ah nawlnak tuah ding in kan i zuam cuahmah ko. Snr-Gen Min Aung Hlaing zong nih Thailand ram i tuanvo ngeitu pawl a ton hna i bawmhnak a hal ko hna,” tiah a chimh hna.

Bang Kwang tonginn bawi Mr. Sophoon Yimphreecha zong nih, “Thonginn ah Win le Zaw cu nawlzul tein an um ko. An ngan zong a dam ko,” tiah thil sining pawl cu Gen. Mya Tun Oo sin ah a chim ve.

Thailand ram ah a voi 7nk Thailand-Myanmar ralbawi pawl tonpumhnak a um i cuka hmun ah cun Snr-Gen Min Aung Hlaing he Gen. Mya Tun Oo cu a kal ve in caan karlak chung ah Win le Zaw a vung veh hna hi a si.

Win le Zaw tiah a tawinak in auhmi Ko Win Zaw Tun le Ko Zaw Lin cu aluancia September 2014 ah Thailand ram, Koh Tao tikulh ah British nungak tlangval an thah hna timi sualphawtnak in December 2015 ah thihdan pek an rak si.

Nawlnak an tuah nain August 29 ah Thai Supreme Court nih thihdan thotho a pek hna caah Thai siangpahrang sin lawng ah nawlnak tuah khawh a si i, ni 60 chung ah nawlnak tuah ding in timhtuahnak an ngei.

-Sandaw Ching

Latest News