Kan Rawlttam Lo, Mask Kan Herh Tiah Aussie Sibawite nih an Chim

| The Chin Journal | Hakha, Chin State

Australia ram COVID-19 zawtnak dohnak ah hmaisuang in rian a ttuan cuahmahtu sibawite le nursete nih kan rawl a ttam lo, zawtnak in i runvennak hmaihuh/Mask tu kan herh, tiah an chim.

“Nitin in lunglawmhnak ca kan don i, micheu nih cun pizza le eidin phunphun a kan kuat. Asinain, an sin ah va kal i chim ka duhmi cu ‘Hey, kan rawl a ttam lo hih; Mask tu kan herh!’ ti hi a si,” tiah sibawi nu pakhat nih Reuters thawngzamhnak sin ah a chim.

“Lenglei i aa chokmi khi zoh hna hmanh u. N95 Mask an i benh dih ko. Asinain, sizung tu ah cun Mask kan i tingzo lo,” tiah New South Wales ah a ummi sizung pakhat i sibawi nih a chim.

Australia Medical Association ah rian a ttuanmi Andrew Miller nih, “Sii lei rianttuantu saya/mate nih pumpak i runvennak thilri (PPE) tlamtling in kan hmu lai lo ti hi an phang ngaingai. Aruang cu ramdang ah COVID-19 mizaw a conghramtu sii saya/ma tampi an nunnak a liam caah a si,” tiah a chim.

COVID-19 a chuah hnu in vawleicung huap in N95 Mask chambaunak a um i US ram ah cun sii lei rianttuantu saya/mate nih lamzawhnak tiang in an tuah.

Atu tiang vawleicung ah COVID-19 aa chawnmi minung 1.3 million an tling deng cang i, 69,000 leng an nunnak a liam cang.

Australia ram ah minung 6,000 hrang nih zawtnak an ngei i, minung 39 hi atu tiang an nunnak a liam ve cang.

Ref: Reuters

Latest News

News in Burmese