Kalay UDP Party nih Chin Party an Dirkamh Lai

| The Chin Journal | Hakha, Chin State

Kalay khua i United Democratic Party (UDP) nih thimnak ah CNLD dirkamh ding in timhtuahnak an ngei, tiah theih a si.

UDP party Chairman U Kyaw Myint cu Mandalay U-Bo thonginn in a rak zaammi a si ruang ah palik nih an tlaih i, cu hnu ah cun Union Election Commission (UEC) nih UDP party cu phungning in a hrawh.

Kalay UDP party Chairman U Hung Thang nih, “Chin party nih teinak a hmuh nakhnga kan dirpi lai. Chin party ah cun kan lut lai lo. Asinain, vote tu cu Chin party kan pek lai. Hihi (Kalay) UDP party i khuate le sang ttuanvo ngeitu upa pawl biachahnak a si. Chin party dirkamh kong ah nihin ah minsen thutnak tuah ding zong in timhtuahnak kan ngei,” tiah a chim.

Aralaimi October 31 ah CNLD chairman Pu Lian Nawn inn ah Kalay UDP party upa le Kalay CNLD party upa pawl rawldum ttinak zong ngeih an i tim.

Kalay CNLD Chairman Pu Lian Nawn nih, “UDP party chairman U Hung Thang nih cun kan in dirpi hrimhrim hna lai a kan ti. Asinain, UDP party chung i Kawl miphun pawl belte cu USDP ah vote a thlami zong an um ve lai,” tiah a chim.

Hakha UDP party belte cu aho party dah kan dirpi lai timi fiang in baichahnak an ngei rih lo. “Kan pu biaceihnak (November 3) thawngpang kan hngah lio a si rih” tiah Hakha UDP upa pakhat nih The Chin Journal ah a chim.

Cherhchan: Zalen

Latest News

News in Burmese