Kalay Chinmi Hna Nih Hakha Gen. Aung San Milem Phun an Duhlonak an Langhter

| The Chin Journal | Hakha, Chin State

Chin ramkulh khualipi ah Gen. Aung San milem phunnak kong he pehtlai in Kalay ah khua a sami Chinmi hna nih an duhlonak an langhter, tiah theih a si.

Area Peace and Development Forward zatlangbu ah tuanvo ngeitu pakhat a simi GS Mang nih,

“Chinram khualipi ah Gen. Aung San phun kong he pehtlai hin Chin ramkulh cozah nih mipi ruahnak a hal hmasa awk zong a si. Panglong hnatlaknak tlamtlinter hi maw mipi nih an duh, asiloah, milem hi dah an duh deuh timi mipi sin ah an hal awk a si,” tiah a chim.

Cun, milem phun timi hrimhrim hi acozah nih a tuah awk rian a si lo tiah GS Mang nih a langhter chap:

“Acozah nih cun acozah riante kha a tuan awk a si ko. Milem sernak ah an hmanmi Budget hi mipi thanchonak le fimcawnnak hna ah hmang hna sehlaw a tha deuh lai,” tiah a chim chap.

Chin Student Union (Kalay) ah hruaitu a simi Van Thawng Thang nih, “Khrihfa tam u kan umnak ram ah milem ser hi sullam a ngei lo. Cun, milem hrimhrim hi a sunsakmi miphun kan si lo…Gen Aung San hi Chinmi i Hero zong a si lo. Kan upatmi minung pakhat cu a si ko. Chinmi kan pale milem zong kan chiah lai an ti. Asinain, atu tiang Chinmi kan pale milem an hnuaimi a um lo. Thanthling a kan liahter menmen a si,” tiah a chim.

CRWDG ah tuanvo ngeitu a simi Lian Tuang nih, “Mipi duhlo buin hramhram in Aung San milem chiah an timhmi hi a tha lo ngai. Atulio hi Aung San milem phun caan a cu rih lo; mipi khuasak tuntuknak a tlamtlin tik le mipi nih an lung a fian tik caan ah chiah awk a si,” tiah a chim ve.

Hakha khua ah NLD cozah nih phun a timhmi ting 200 MMK man Gen Aung San dar milem cu Hakha khua ah a phan cang i Chin ramkullh cozah zung ah fim chung a si.

Milem phunak hmunhma tlamtling in ngeih a si rih lo ruang ah atu tiang cu milem cu phun kho loin an chiah rih.

-Chin World

Latest News