Kalay khua ah COVID-19 zawtnak in nizan (Nov. 10) ah minung pakhat a nunnak a liam, tiah theih a si.
A nunnak a liammi pa hi kum 82 minung a si i, Kalay khua, Chan Meh Aungsi sang ah khua a sami a si.
Hi pa hi Home Quarantine ah an chiahmi a si i, a thih hnu ah a Swab an check tik ah COVID-19 zawtnak a ngei tiah nihin ah an fehter.
Kalay khua cozah thawngzamhnak ttuanvo ngeitu Ko Thanh Sin nih, “COVID-19 mizaw kan rak hmuhnak inn ah a um vemi a si i, Home Quarantine in kan chiahmi a si. A thih hnu ah kan check tik ah COVID-19 zawtnak a rak ngeihmi kan hmuh,” tiah a chim.
Atutan kum 82 pa hi Kalay khua ah COVID-19 zawtnak in a voi khatnak bik a nunnak a liammi a si.
Atulio Kalay khua ah COVID-19 mizaw 53 an um i hmun 2 ah cu mizaw pawl cu an conghramh hna, tiah theih a si.
[Cherhchan: Zalen]
