June 25-29 Tiang Hakha ah Paletwa Ralzam Ca Bawmhalnak an Ngei Lai

| The Chin Journal | Hakha, Chin State

Chinram nichaklei ah a ummi Hakha, Thantlang le Falam cu Chin miphun lak ah milu lei in a tam bik, acozah zungthu lei zong in a tam bik kan si pin ah Hakha hrimhrim cu khualipi kan si caah Chinmi nih thil pakhatkhat kan ton tikah ahmasa bik ah a kut a zo i a kaa a pau hmasatu kan si peng a herh.

2015 thawk in a rak cangmi AA le Kawl ralkap karlak Paletwa peng chung kahdohnak lak ah kan ram ciacia ah ralzam 2,000 (Paletwa Peng Uk Zung cazin ning in) leng an um.

June 7 ah Kaladan chaklei hraap ah kahdohnak a chuak than i khua 5 in minung 700 leng nih an khua an chuahtak i Paletwa ah an rak zaam hna.

Chinram chung i Mindat, Matupi le Falam ti bantuk ah cun kanmah Hakha hlan in bawmhnak an halpiak cang hna.

Atu zong ah Hakha ah mino hruainak in innkip kai in bawmhnak halpiak an timh hna. Khua dang nak cun kan tlai deuh cang. Asinain, Hakha khuasa nulepa hna nih khuadang bawmhnak an pekmi hna nak tam deuh hmu ding in kan ruahpiak hna a herh ve lai.

Hakha ah mino nih an dirhmi Paletwa Ralzam Mibawmtu Phu nih aralaimi June 25-29 tiang Hakha khuami hna sin ah tlawm halnak an rak tuah te lai.

Latest News