Judge Te He Thla a Cammi Nute nih American Idol Winner Laksawng a Co| VIDEO

| The Chin Journal | Hakha, Chin State

American Idol zuamnak ah i tel kho ding in hneksaknak (Audition) tuah lio ah Judge pathum he kutsih in thla a cammi Minak nute nih May 17 ah tuahmi American Idol Season 18 ah teinak nganpi a hmu, tiah theih a si.

Hi nute hi Samantha Diaz (kum 20) a si i hla a saknak min ah Just Sam tiah mipi nih an theihmi a si.

American Idol Audition lio ah khan American Pathian hlasa minthang Lauren Daigle nih a sakmi “You Say” timi hla a sak nain sa kho loin a um i mitthli he aa ciah.

Nehhnu ah cu kong cu an hal tik ah Just Sam nih, “You Say timi Pathian hla nih hin kan lungthin hi fak tuk in a tongh. Mah ruang ah cun ka ttahnak a si,” tiah a chim.

Audition lio ah “You Say” timi Pathian hla tlamtling in a sak khawh lo caah a dang hlatu a sa tthan i, Judge te nih American Idol ah na lut kho tiah an cohlan.

A lung aa lawmh tuknak ah a mitthli he aa ciah i, “Nanmah he thlacam ta ka duh. A ngah lai maw? Nanmah he thlacam awk ka herhmi a um,” tiah Judge pathum cu a hal hna.

Judge pathum nih a ngah tuk an ti i, Just Sam nih Judge pathum cu an kut a tlaih hna i thla a campi hna.

Hi nute hi a ngakchiat tein a nulepa nih an kaltakmi a si i, a pi le a pu he khua a sami a si.

Chungkhar pawcawmnak ca ah tiin khuachung i vawleitang tlanglawng chung le tlanglawng lamkam ah mizapi hlasakpiaknak in tangka a kawlmi a si i, cuticun a pi le a pu cu a ngakchiat tein a cawmtu a si.

Just Sam hi New York i sang pakhat a simi Harlem ah a ummi a si i, atutan American Idol ah hin a voi khatnak bik vanlawng kaa cit a si ti zong a chim.

American Idol Season 18 ah Winner laksawng a co hnu in Lauren Daigle nih Pathian hla sak tti ding in a sawm ve i, “You Say” timi Pathian hla zong an sa tti (A cung deuh video).

Cherhchan: The Christian Post, ABC News

Latest News

News in Burmese