/

Joe Biden nih Donal Trump a Tei Cang tiah US Ramchung Media Pical Pawl nih an Thanh

The Chin Journal | Hakha | Chin State
A voi 46nk US rampi President Joe Biden

Pennsylvania ah Joe Biden nih Donald Trump cu vote 2,500 hrawng in a tei cang caah Joe Biden cu a voi 46nk US rampi President a tling cang, tiah US ramchung media pical pawl nih thawng a thanh.

Democrat Party aiawh in Donald Trump a zuamcawhtu Joe Biden cu Scranton khua ah a chuakmi a si i, US rampi vice president zong a rak ttuan balmi a si, tiah CNN nih a langhter.

Tuan deuh ah khan Joe Biden nih Electoral Vote 253 a hmu i, Electoral Vote 20 a umnak Pennsylvania ah teinak a hmuh chap caah US President tlin khawhnak Electoral Vote 270 a lonh.

Atutan 2020 US rampi President thimnak vote a thlatu milu hi 2016 nakin an tam deuh i, Joe Biden zong hi US tuanbia ah mipi nih vote tam bik an pekmi a si.

CNN nih a tauhmi Result ah cun vote a fian rih lonak Arizona, Nevada, Alaksa, Georgia le North Carolina an taang rih nain Trump nih a dihlak in a lak hmanh a teinak lam a um ti lo.

Associate Press nih a tuahmi Result ah cun Pennsylavania lawng si loin Arizona zong ah Joe Biden nih a tei cang i, Electoral Vote 284 a hmu.

Fox News nih a tuahmi Result ah cun Joe Biden nih vote 290 a hmu i, Trump nih vote 214 a hmu. Fox News nih hin tuante ah khan Arizona ah Joe Biden nih a tei tiah an rak telh cangmi a si.

Atu taing ah US ramchung Media pical a simi CNN, Fox News, The New York Times, ABC News le Associate Press pawl nih “Joe Biden nih a tei cang,” tiah an fehter.

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19