“Jesus is King” Timi Kenye West Album Billboard No. 1 ah a Dir| Video

| The Chin Journal | Hakha, Chin State

American Rapper Kenye West nih October 25 ah a thlahmi “Jesuh Cu Siangpahrang a Si” (Jesus is King) timi Album cu mipi nih an hun zoh ngaingai ca ah Billboard No. 1 hmunhma bak ah a phan.

Atutan hi Billboard 200 Chart ah Kenye West hla Album pehzul in No. 1 ah a voi 9nk a dir a si i, Eminem he aa khingkhaang an si cang, tiah CNN nih a langhter.

The Christian Post nih, “Kenye West nih aa chuahmi Jesus is King timi Album thawng in American mino tampi nih Google ah ‘Jesuh cu ahodah a si?’ ‘Khrihfa timi cu zei bantuk dah a si?’ timi kong pawl an hun kawl cuahmah,” tiah a langhter.

American Bible Society zong nih, “Free Bible for Kenya’s Fan” timi Campaign an hun tuah colh i mino a thongthong sin ah Bible alak in an pek hna.

Jesus is King timi Kenye West Album thar ah hla fung 11 an i tel.

Kenye West nih, “Thawngttha karhchoter ding in Khrih rianttuantu ka si cang. Ka nunnak ah Jesuh Khrih zeitindah aa phuan timi kan theihter hna lai. Kei cu sal ka si ti lo, Khrih i a fa ka si cang. Pathian fa ka si cang. Khrih thawng in ka luat cang,” tiah GQ Media nih biaruahnak a ngeih lio ah a chim.

Zumtu hna nih hin anmahle thiamnak cio hmang in Khrih nih an nunnak a tuahmi pawl hi mizapi sin ah phuang ngam cio hna seh ti ka duh, tiah Kenye West nih a chim chap.

Kenye West nih aa chuahmi Jesuh is King timi Album chung i “Salah” timi hla ah Johan 8:33, 36 cacaang zong aa cherhchan i “Khrih Thawng in Miluat ka Si” tiah Rap hla in a aupi.

Atulio valeicung rapper minthang bik pakhat a si vemi nih Pathian hla in Rap Album aa hun chuah tik ah Music vawlei cu a hninh bak ve.

https://youtu.be/sOAwr1WhNeU

Aluancia thla khat hrawng in khan Kenye West hi US ramchung khua tampi ah tlawn hram a rak thawk cang i Zarhpi Ni ah pumhkhawhnak a tuahpi thluahmah hna.

Pathian hlasaknak le tehte khaannak ti bantuk in pumhkhawmhnak ah zumtu pawl a hruai hna i, a kalnak hmun kip ah “Jesus is King” timi Album chung i hla pawl a sa.

Atu bantukin Kenye West nih Pathian sin ah a nun a hun pek i Pathian hla a hun i chuah tik ah mi tampi nih faak ngaiin an soisel ve.

Sihmanhselaw, Kenye West nih cun, “Pathian sin ah thlacam in ka rak halmi hi Amah Pathian nih a ka pek hrimhrim tiah ka zumh. Cucaah, Khrih thawngttha aupi hi ka ngol a si ahcun a ka pekmi thluachuah zong a ka chuh tthan khawhmi a si,” tiah Apple Music Beats 1 ca ah Zane Lowe nih biahalnak a ngeih lio ah a chim.

-CNN, Fox News, The Christian Post

Latest News