Italy: Ni Khat Chung ah Coronavirus in Minung 49 an Nunnak Liam

| The Chin Journal | Hakha, Chin State

Italy ram ah ni khat chung lawnglawng ah Coronavirus in minung 49 an nunnak a liam, tiah theih a si.

Atulio ah Italy ram cu Coronavirus in a nunnak a liammi an tam biknak ram pahnihnak a si. Minung tam bik an nunnak a liamnak ram cu zawtnak aa thawknak Tuluk ram a si.

Coronavirus zawtnak in Italy ram ah atu tiang ah minung 233 an nunnak a liam cang i, minung 5,000 leng nih zawtnak an i chawn.

Italy ram ii Coronavirus an hmuh hmasa biknak Lombardy hmunram le Milan khuapi cu nihin thawk in lenglei he pehtlaihnak ngeih lo ding in kutka khar an si ve cang.

Italy ram ah khulrang tuk in Coronavirus a karh caah rian in aa din cangmi ramchung sibawi pawl zong Coronavirus doh awk ah Italy cozah nih a auh tthan hna.

Tuluk ram leng ah atulio vawleicung ah Coronavirus a zual biknak cu Italy, South Korea le Iran ram hi an si.

South Korea ah minung 50 an thi i, minung 7,000 leng zawtnak an i chawn. Iran ah minung 150 hrawng an nunnak a liam i, minung 6,000 hrawng zawtnak an i chawn, tiah theih a si.

Ref: NYPOST, WHO

Latest News

News in Burmese