Italy ah COVID-19 Mizaw Thloptu Sibawi 40 Leng an Nunnak Liam Cang

| The Chin Journal | Hakha, Chin State

Atulio vawleicung ah COVID-19 zawtnak a zualnak bik ram Italy ah COVID-19 mizaw pawl a thloptu sibawi minung 40 leng an nunnak a liam cang, tiah theih a si.

February thla thawk in COVID-19 zawtnak nih Italy ram fak tuk in a tlak i minung tam tuk an nunnak a liam pin ah sibawi 41 zong an nunnak a liam cang.

COVID-19 mizaw a conghramtu Italy sibawi 5,000 leng zawtnak an i chawn i cu chung ah cun minung 41 an nunnak a liam hi a si.

COVID-19 zawtnak nih Italy ram fak tuk in a den ruang ah Italy cozah nih aa din cangmi sibawi pawl zong a auh tthan hna i zawtnak doh ding in rian a khinh hna.

Italy ram ah COVID-19 zawtnak aa chawnmi minung 80,500 leng an hun phan i minung 8,200 leng an nunnak a liam cang.

Nizan March 26, ni khat chung lawnglawng ah khan Italy ram ah COVID-19 zawtnak in minung 712 an nunnak a liam.

Italy dih in atulio vawleicung ah Spain, France, Iran le US hi COVID-19 zawtnak a zual biknak ram an hun si.

Nizan ah khan Spain ah minung 718 an thi; France ah minung 365 an thi; US ah minung 268 an thi i, Iran ah minung 157 an thi (Nizan March 26 cazin).

Vawleicung huap in COVID-19 zawtnak a ngeimi minung 552,000 leng an si cang i, atu tiang ah minung 25,000 leng an nunnak a liam cang.

Ref: The Guardian

Latest News

News in Burmese