Italy ah COVID-19 in Ni Khat Lawng ah Minung 700 Leng an Thi

| The Chin Journal | Hakha, Chin State

Atulio vawleicung COVID-19 zawtnak a zual biknak Italy ram ah nizan March 24 ni khat chung lawng ah khan minung 743 an nunnak a liam.

Nizan ni khat chung telawng ah minung 743 an nunnak a liam caah atu ah cun Italy ramchung ah COVID-19 in a nunnak a liammi 6,820 an si cang.

COVID-19 zawtnak aa thawknak Tuluk ah atu tiang ah minung 3,277 an nunnak a liam i, Italy nih let khat nak tam in a lonh cang.

Spain ram zong ah tihnung in mithi an karh. Nizan March 24 lawng ah minung 680 an thi i, nihin ah minung 443 an thi chap. Atu tiang ah Spain ah a thimi 3,434 an si cang.

US ram zong ah COVID-19 zawtnak a ngeimi an hun karh thluahmah i March 25 tiang ah minung 50,000 leng zawtnak an ngei i minung 800 dengmang an thi cang.

COVID-19 zawtnak damhnak ca ah sii chuah khawh ding in China le US nih an i zuam cuahmah nain atu taing ah a tlamtling rih lo.

China nih cun minung 100 sin ah hneksaknak a tuah cang. Sihmanhselaw, December 2020 hrawng lawng ah tlamtling in hi sii hi serchuah khawh te dawh a si.

Ref: CCGN, Aljazeera, CNN

Latest News

News in Burmese