Iran-US Ral Entainak a Dai, President Trump nih Bual a Co

| The Chin Journal | Hakha, Chin State

US President Donald Trump nawlpeknak in January 3 ah Iran ralbawi Major General Qassim Suleimani cu Iraq ram ah thah a si tik ah US-Iran karlak ah ral a tho hrimhrim lai, tiah ruah cio a si.

Iraq ram ah nawl a ngei bik minung pahnihnak a simi Suleimani, US nih a vun thah taktak tik ah Iran ram caah sunghzatlaknak ngapi a si pin ah Middle East i Iran he pehtlaihnak a ngeimi Hezbollah hriamtlai tibantuk ca zong ah sunghnak nganpi a si.

Iran nih lehrulnak ah Iraq ram i US Airbase le Erbil khua i US pehtlaihnak zung cu Ballistic Missile 20 leng in a kah nain a thimi cu chimlo hliamhma a pumi zong an um lo.

Middile East ramkhel a ngiatu hna nih, “US he ral i doh taktak ding Iran nih a duhlo/a zenh ca ah American minung thihlohnak chuahpi lo ding in ralrin peknak phun ah Iran nih a kahmi a si kho,” tiah an ruahdamh ve.

Iran nih cun, “US minung 80 hrawng an thi tiah thawngpang a chuah nain ahohmanh a thimi le hliam a pumi an um lo,” tiah US President Donald Trump nih January 8 i biachimnak ah a langhter.

US nih 2003 ah Iraq a rak luh khawh kha ni 21 lawng a rau i Iraq cu a lak khawh. Atu Iran belte cu Iraq bantukin fawilebai cun a tei lai lo nain Sea Power le Air Power hrimhrim ah let tampi in Iran nakin US a tthawng. A donghnak cun Iran tu a fak deuh suamau ding a si, tiah thiamsang hna nih an ruahdamh.

January 8 i President Trump biachimnak ah Iran he i do ding in timhtuahnak an ngeih lonak a langhter hnu ah Iran cung ah sipuazi lei dantatnak tu pek chap ding in timhtuahnak an ngeihmi kong a langhter.

President Trump chan ah ISIS ralhrang bawizik Baghdadi an thah khawh pin ah Bush le Obama chin in thah an rak duh ngaimi Suleimani cu atu ah an thah khawh chap tik ah Trump cozah ca ah teinak nganpi hmuh a si.

Cherhchan: VOA, Asia One, 7Day News

Latest News

News in Burmese