Iran Ram ah Acozah Duhlo Lamzawhnak a Karh Thluahmah| Video

| The Chin Journal | Hakha, Chin State

Minung 176 an i citmi khualtlawng vanlawng Iran nih a kah hnu ah an ramchung khuapi pawl ah acozah duhlo lamzawhnak a hun karh thluahmah.

January 3 ah US nih Iran Quds Force i ralbawizik Maj. Gen. Soleimani a thah i, Iran nih January 8 ah Iraq ram US ralkap hmunkhuarnak cu Ballistic Missile 20 leng in a kah ve.

Iran nih US ralkap hmunkhuarnak a kah hnu tlawmpal ah minung 176 an i citmi vanlawng kah a ton hi a si. Cu vanlawng cu Iran khualipi Tehran khua pawng ah a tla.

Ahmasa ah cun Iran cozah nih, “A seh a rawh ruang ah a tlami a si,” tiah rak ti. Asinain, ni thum hnu ah kan kah sual, tiah a chim tthan.

Sualnak ngei loin minung 176 an thihmi kog ah Iran cozah nih ni thum chung aa phehmi ruang ah Iran rammi (Abikin, sianghleirun siangngakchia mino pawl) an lung a faak i, Iran cozah dohkalh in lamzawhnak an tuah hi a si.

Iran ramchung i minthang Private Media pawl nih an Headline ah Iran ralkap nih khualtawng vanlawng a kahmi kong cu “Ngaihthiam awk ttha lo Palhnak” tiin le “Iran ram ca ah ningzahnak nganpi a si,” tiin an langhter ve.

Zarhpi ni thawk in Iran ram khualipi Tehran ah acozah duhlo lamzawhnak an tuah i, a dang khuapi pawl zong nih lamzawhnak an hun tuah thluahmah.

Lamzawhtu minung hi a thongthong in an si i, ralkap nih nu pahnih an kah hna i hliamhma an pu.

Tehran khuapi lamzawhnak ah cun sianghleihrun siagngakchia pawl nih Maj. Gen. Soleimani hmanthlak pawl a thleh hna i, Iran cozah cu “Minung a bubu in a thattu misual” tiah an au i sual an phawt.

January 11 ah khan minung 176 an i citmi vanlawng a tlaknak hmun ah Iran rammi pawl nih ngaihchiatpinak phazawngdan (Candle) vannak an tuah i, cuka hmun in cun duhlo lamzawhak aa thawk hi a si.

Minung 176 an nunnak a liam i, an chungkhar pawl le vawleicung mipi ngaihchia in an um lio ah zei ruang ah dah Iran cozah nih ni 3 chung a sual aa pheh tiin Iran mipi lungfak in an um i, acozah ralchanh in lamzawhnak an tuah hi a si.

US President Donald Trump nih, “Lamzawhtu na mipi pawl that hna hlah…USA nih nan sining kan i cuanh hna,” tiah Iran cozah ralrinnak a pek i, “Iran mipi nan lei ah kan dir ko,” tiah Twitter le Facebook hmang in thazaang peknak a langhter.

Cherhchan: CNN, NBC News

Latest News

News in Burmese