Iran Nih American CIA Agent 17 a Tlaih Hna, Micheu Thihdan a Pek Hna

| The Chin Journal | Hakha, Chin State

Iran nih a ramchung ah hmun a khuarmi Ameircan CIA riantuannak hmun a luh hnawh i minung 17 a tlaih hna, tiah anmah Iran cozah thawngzamhnak nih a langhter.

Tlaih a tongmi CIA agent pawl hi Iran ramchung sipuazi riantuannak, nuclear ralhriam sernak, ralkap riantuannak lei kong thawngpang thlithup in a latu an si, tiah Iran cozah nih a langhter.

Iranian Intelligence Agency nih, “Tlaihmi minung 17 hi CIA minung pawl an si. Micheu thihdan kan pek hna,” tiah a langhter.

Aluancia June thla chung zong ah khan Iran nih, “CIA i Cyber Network nganpi pakhat kan phorzar khawh i ram kip ah a cawlcangmi CIA Spy tam nawn kan tlaih hna,” tiah a rak chim bal.

US President Donald Trump a kai hnu Iran le US karlak nuclear hnatlaknak a hrawh i cu caan thawk cun ram hnih karlak entainak a linsa chin.

Cun, tukum May thla chung ah khan US nih Iran cung ah sipuazi lei dantatnak a rak khinh than.

US nih Iran cung ah dantatnak a khinh than hnu thla 3 a rauh ah atu bantuk in CIA Agent pawl Iran nih ka tlaih hna tiah thawng a thanh hi a si.

-Business Insider

Latest News