Inntek Ngakchia a Kut Tisa ah a Hnimtu Myanmar Sinum Singapore ah Thongthlak

| The Chin Journal | Hakha, Chin State

Rian a ttuannak inntek hna i kum khat le cheu a simi ngakchiate i a kut tisa chung ah a hnimtu Myanmar sinum nu cu Singapore biaceih zung nih thla 14 thonghtlak ding in dantatnak a pek, tiah theih a si.

Myanmar sinum nu hi Lin Lin Htwe (kum 30) tiah theihmi a si i, hi inn ah hin zarh hnih lawng rian a ttuan rih.

Zanlei rawl a chuan lio ah inntek hna i an fate a kut cu thisa chung ah a hnim hnu ah “A cang sualmi a si/Accident” tiah inntek nupa cu a ti hna.

Inntek nih report an tuah i Lin Lin Htwe cu palik nih an tlaih hnu ah tazacuai a si.

“Kan ram ah tlun asiloah inn dang ah i tthial ka duh ruang ah atu bantuk hin ka tuah hi a si,” tiah biaceih zung ah Lin Lin Htwe nih a chim.

Ahmasa ah cun aa pheh nain coka ah an chiahmi CCTV ah ngakchia a kut tisa ah a hnim lio a langh caah aa pheh kho lo.

Tisa ah kut hnim a tongmi ngakchiate hi a hliamhma a fak ngai i, atu hnu kum 2 tiang hmape a cuang lai, tiah sibawi nih a chim.

Lin Lin Htwe nih inntek ngakchiate a kut tisa ah a hnim hi aluancia January 2020 ah khan a rak si i, nizan tihni October 28 ah khan Singapore biaceih zung nih thla 14 thonghlak ding in dantatnak a pek hi a si.

[Cherhchan: Channel News Asia]

Advertisement

Thawngpang Thar