Innhmun Pekmi a Zuar Chintu Pawl Hmun Chuh an Si Lai: Pu Zo Bawi

| The Chin Journal | Hakha, Chin State

Hakha khua i innhmun samhmi ah hmun a tingcotu hna nih an tincomi innhmun an zuar chin a si ahcun chuh tthan an si lai, tiah Chin ramkulh Hluttaw Chairman Pu Zo Bawi nih a chim.

Hakha khua ah innhmun samhmi Acre 650 leng a um i cu chung ah cun Acre 300 hrawng hi mizapi sin ah phawt hamsa a si lai.

“Hakha ah innhmun 650 leng samh ding in acozah nih kan timhtuahmi a um. Cu chung ah cun Acre 300 leng hi tu thla dih, June thla thawh ah mizapi sin ah phakter ding in timhtuahnak kan ngei,” tiah Pu Zo Bawi nih a chim.

Asinain, innhmun pek hnu ah anmah duh in a zuar tthantu an um ahcun dantat an si lai, tiah a chim chap.

“Atu Acre 300 leng le a taangmi Acre 300 leng hi kan phawtzamh khawh dih a si ahcun Hakha ah innhlang an um ti lai lo. Ahopaoh hmun pakhat cio hmu kong ding in kan timhtuah. Asinain, innhmun kan pek hna hnu ah sipuazi ca ah an i zuar a si ahcun kan chuh tthan hna lai. Innhmun a ngei lo taktakmi pawl pek kan timhmi hna a si,” tiah a chim chap.

Chin ramkulh khualipi a simi Hakha ah minung tampi khuasak kan herh caah Chin ramkulh chung khuapi pakua le khuate lei zong in Hakha ah rak i tthial hna sehlaw innhmun pawl phungning tein kan tawlrelpiak hna lai, tiah Pu Zo Bawi nih a langhter chap.

Hakha innhmun samhmi kong tawlrel ning le Hakha khuapi ah Chinram chung khuasa pawl rak i tthial ding in Pu Zo Bawi sawmnak bia a chimmi Video File cu a dihlak in Chin News Journal-CNJ ah kan tar te lai.

Latest News

News in Burmese