India Siangngakchia Nu a Tlaihremtu Pa Pali Hri-awh in an Thah Hna

| The Chin Journal | Hakha, Chin State

India ram, Delhi khuachung bus cung ah siangngakchia nu a tlaihrem i a thatu pa pali cu nihin zinglei ah hri-awhnak in an thah hna, tiah theih a si.

Aluancia December 2012, zan sml. 8:30 ah Delhi khua i Bus cung ah pa paruk nih Nirbhaya tiah auhmi India siangngakchia nu an rak tlaihrem hnu ah an thah.

Palik nih kumtlinglo pate telh in minung paruk an rak tlaih hna i, minung pakhat cu thonginn chung ah 2013 ah khan amah tein aa that.

Kumtlinglo pate cu kum 3 thong an thlak hnu ah India ram upadi ning in luatnak an pek tthan.

Nihin zinglei ah thihdan an pekmi hna misual pali

A taang pali hi 2013 ah thihdan rak pek an si i, India Supreme Court ah nawlnak an rak tuah nain Supreme Court nih a cohlang lo.

Siangngakchia cu tlaihrem le thah a ton kong ah India ramchung ah lamzawhnak zong linsa taktak in a rak chuak i, hi kong nih hin vawleipi zong a rak cul.

Thihdan pek hrimhrim ding in India mipi nih lamzawhnak in fak piin an rak hal.

Atu March 20 zinglei sml. 5:00 ah an pali ning in hri in an awh hna i thihnak in dantatnak an pek hna hi a si.

Ref: BBC

Latest News

News in Burmese