India ah Thla 2 Naupawi Nu Le a Vapate Mei in Khangh an Tong

| The Chin Journal | Hakha, Chin State

India ram, Mumbai khualeng ah a ummi nuva hna cu nu chungkhar lei nih mei in an khangh hna, tiah theih a si.

Nute hi kum 19 a simi Rukmini a si i, thla 2 nau a pawi. A vapa hi Mangest Ransingh (kum 23) tiah auhmi a si. An i thitumhnak zong a sau rih lo.

May 1 ah thla 2 naupawi Rukmini cu a nulepa inn ah a vung leng. A vapa Ransingh nih vung don ding in a nupi nulepa inn cun a va kal.

Sihmanhsehlaw, nute i a pa le a tangle pahnih nih a vapa sin ah an kalter ti lo. Tikah Ransingh le a nupi i a pale karlak ah buainak a chuak.

Ransingh le a nupi cu an velh hna hnu ah Kerosine an toih hna i mei in an khangh hna.

Ransingh le a nupi Rukmini an rak i thitum lio zong ah hin nu lei chungkhar an lung a tlin lo caah an fanu puai zong ah an rak kal lo.

Ransingh hi phunsang an timi Lahor phun a si. Asinain, a nupile chung i Pasi tiah an timi midang hmanh nih tongh an duh lomi hna (Untouchable), sinum rian deuh a tuanmi phun an si.

Ransingh unau pa nih, “An pahnih in hri in an tem hna i innchung ah an hren hna hnu ah mei in an kangh hna,” tiah thawnglatu pawl sin ah a chim.

Ransingh le a nupi Rukmini cu sizung ah an kalpi hna nain a nupi cu a meikangh hliamhma a fah tuk caah a nunnak a liam. A vapa zong thi lo nung loin a um i a thih lai le a nun lai fiang in theih a si lo.

Nuva hna mei in a khaangtu minung pathum zong palik nih an tlaih cang hna, tiah theih a si.

-RT

Latest News

News in Burmese