Hong Kong Lamzawhtu Pawl Sakmi Pathian Hla Tuluk Online in an Hloh Dih| Video

| The Chin Journal | Hakha, Chin State

Atulio Hong Kong ah a cang cuahmahmi lamzawhnak ah lamzawhtu pawl nih an sakmi Hla-Meilah cu “Bawipa cu Hallelujah Tiin Thangthat U” (Sing Hallelujah To The Lord) timi hla hi a si.

June 11 ah khan Hong Kong ram ah lamzawhnak chuah hram aa thawk i Khrihfa pawl nih “Bawipa cu Hallelujah Tiin Thangthat U” timi hla cu an hun sa.

A ruah hlan ah Khrihfa a si lomi lamzawhtu tampi nih an zulh hna i cu hla cu an sak cio. Atu ah cun mah hla hi Hong Kong lamzawhtu pawl ca ah Hla-Meilah ah a hun i cang.

Lamzawhtu mipi nih “Bawipa cu Hallelujah Tiin Thangthat U” timi hla an zungzal tikah Tuluk cozah nih cu hla cu Tuluk online in a hun hloh viar colh ve.

Sihmanhsehlaw, atu July 24 tiang ah lamzawhnak cu pehzul in tuah a si i, cu hla cu lamzawhtu pawl nih an sak thotho peng rih.

Rammi milu zapi lak i zatuak in 10% lawng Khrihfa an sinak Hong Kong ah lamzawhnak ca ah Khrihfa hla an hman tikah mizapi an khuaruah a har cio.

Hong Kong ah cun biaknak he aa pehtlaimi tonpumhnak paoh hi zalong tein le khenkhamnak um loin tuah khawh a si.

Cucaah, hi hla an sak thawng in hin lamzawhtu pawl nih him kan hmu lai tiah an i ruahchan ca ah a si kho, tiah BBC nih cun a langhter.

Hong Kong RC siangngakchia bu President Edwin Chow nih, “Hi hla hi a tawi i a zah zong a fawi. A thiam zong a fawi. Cucaah, mipi nih an i thim hi a si kho,” tiah a chim ve.

“Cun, mah hla an sakmi nih a langhtermi cu hmailei Hong Kong lamthluan hi Pathian kutcung ah a um ti zong a langhter,” tiah Edwin Chow nih a chim chap.

Atu bantuk in Hong Kong ah lamzawhnak fak piin a chuahnak aruang cu February 2019 ah khan Hong Kong cozah nih “Extradition Bill” timi fehter ding in a chuahpi ruang ah a si.

“Extradition Bill” hi fehter a si ahcun Hong Kong le Taiwan rammi hna nih sualnak pakhatkhat an tuah i tlaihkhih an si tikah Tuluk cozah sin ah kuat khawh an si lai. Phundang in cun Tuluk cozah i dantatnak kha Hong Kong le Taiwan rammi zong nih an in lai ti a si.

Cucaah, ramchung ramleng ah a ummi Hong Kong le Taiwan rammi hna nih fak piin an doh. Tuluk nih kan ramkhel system cung ah ningcang loin thlaak aa tim, tiah an zumh caah Hong Kong ah lamzawhnak fak piin a chuah hi a si.

Latest News

News in Burmese