Hliamhma he a Nunnak a Liammi Chin Palik Kong Biadik a Chuah Nakhnga Nulepa Nih an Hal

| The Chin Journal | Hakha, Chin State

Chin ramkulh, Kanpetlet peng, Cindwe khua ah palik rian a ttuanmi Salai Htin Mana (kum 23) a nunnak a liammi kong he pehtlai in biadik a chuah nakhnga rak ka tawlrelpiak hram hna seh, tiah Salai Htin Mana nulepa nih bawmhalnak an tuah.

Salai Htin Mana cu Malaysia ah a um liomi Kanpetlet khuami U Mana Naing le Daw Hlu Hung i an fale paruk lak ah upabik a si i, palik rian a ttuannak kum 2 hrawng a si cang.

October 18 ah khan Kanpetlet ah a ummi Daw Hlu Hung cu phone an rak chawnh i nan fapa a dam lo tuk caah rak la u, tiah palik zung nih thawng an thanh.

“A dam lo tuk rak la u tiin a kan auh caah motorcycle in U Ling Naing he kan vung kal. Ka fapa cu Cindwe sizung ah an rak chiah i a holh zong a holh kho ti lo. Ihkhun tang ah an chiahmi ka fapa thilpuan ah thisen aa nehmi kan hmuh tik ah zei thisen dah a si tiah kan hal hna. Cindwe sakhaanhmu nih sii an chunhnak thisen a si tiah a kan ti. Ka fapa cu bia zong a chim khawh lo caah thil sining kan hal kho lo. Cindwe sizung in Kanpetlet sizung ah kalpi u a kan ti. A riantuannak palik zung zong nih motor a kan hlanpiak lo. Kanmah tein motor kan i hlan i mah hngal loin a ummi kan fapa cu Kanpetlet sizung ah kan kalpi. Sizung kan phakpi ni October 19 ah a nunnak a liam,” tiah Salai Htin Mana i hringtu nu Daw Hlu Hung nih The Chin Journal ah a chim.

Ruak fimhlawm le thianhlimh ding in an timhtuah lio ah Salai Htin Mana angki cu an hun phoih i, a hnawng, a ttang, a baan le a paang ah fak piin tukvelhnak ruang ah a duk dihmi hmaneh pawl an hmuh.

“Ka fapa a thih hnu ah a angki kan phoih i a takpum ah tukvelhnak ruang ah a duk dihmi hmaneh pawl kan hmuh hna. Cucaah, kan fapa hi zawtnak ngaingai in maw a thih asiloah pakhatkhat tukvelhnak ruang ah a thih timi hi rak kan hlathlaipiak hna sehlaw kan duh,” tiah hringtu nu nih a chim chap.

“Ka fapa a thihnak kong le a duk dihmi a hmaneh pawl hmanthlak Facebook ah kan tar ruang ah Kanpetlet penguk nih a kan sik,” tiah Malaysia ah a ummi Salai Htin Mana i a pa U Mana Naing nih a chim.

Kanpetlet ah a ummi Daw Hlu Hung zong October 25 ah Kanpetlet peng palik zung nih an auh i Cindwe khua i a fapa an vung hmuh ningcang pawl an hal hna.

“October 25 ah palik sakhaan ah a kan auh. Cindwe sizung ah ka fapa zeitindah a um timi pawl an ka hal. Zei dang cu a kan chim lo,” tiah a chim.

Hi kong he pehtlai hin Salai Htin Mana cu zawtnak ruang ah a thi tiah palik nih an ti nain a takpum ah tukvelhnak hma pawl an um caah hringtu a nulepa a pa nih zei raung ah dah a thih rereng timi fiang tein theih kan duh tiah nawlnak an tuah hi a si.

Latest News