HBDO nih Kum Khat ah Thisen Laang 600-700 Tiang an Hlut

| The Chin Journal | Hakha, Chin State

Pu Cung Hu hruaimi Hakha hrambunh Hope Blood Donor Organization (HBDO) nih kum khat ah thisen laang 600 in laang 700 karlak hi kumtin an hlut tawn, tiah kan theih.

Pu Cung Hu nih, “Thla tin laang 50 in laang 80 karlak hi kan hlut. Kan tuak ahcun kum khat ah laang 600-700 hrawnghrang hi kan hlut khawh,” tiah a chim.

Hope Blood Donor Organization cu Pu Cung Hu nih December 2004 ah a rak dirhmi a si i, atu ah cun caan hmaan tein thisen a hlutu hi minung 200 hrawnghrang an si.

Cun, chawva lei in thla khat ah 1,000 in a thawhtu hna hi Hakha ah minung 1,500 hrawng an um i, minung 3,000 tiang phan kho ding in an i zuam cuahmah lio a si.

“Hi thisen hlutu bu hi a tuah kho thai lai lo tiah a rak ruatmi zong an um. Aruang cu chawva zong tampi a dih ding a si caah kum khat hrawng a tuah lai i, a ngol te ko lai tiah an ruah. Asinain, Pathian zaangfahnak in kum 4 kum 5 tiang kan hun kal i, mipi nih anmah lungtho tein an rak i tel,” tiah Pu Cung Hu nih a chim.

Hope Blood Donor Organization an rianttuannak kong le naite ah Hakha ah an onmi alak in i tthumh khawhnak riahbuk kong he pehtlai in The Chin Journal le Pu Cung Hu biaruahnak tlamtling cu The Chin Journal Page ah Video in tlamtling tein kan rak tar te lai.

Latest News

News in Burmese