Hakhathar Phan Paletwa Ralzam Ca ah Hakhathar Mino nih Bawmhnak Hal

| The Chin Journal | Hakha, Chin State

By Phun Sang| Hakhathar sang ah a rak phanmi Paletwa ralzam chungkhar ca ah Hakhathar mino hruainak in bawmhnak an halpiak hna, tiah ttuanvo ngeitu sin in thawng kan theih.

Palewa peng in Thantlang peng Tikir khua ah an rak phami ralzam chungkhar khat cu dam lonak ruang ah Hakha ah an rak phan i, chungkhar pa bik nih Hakha an phak hnu a liamtak hna.

Taantakmi nu le ngakchia cu Thantlang peng Tikir khua ah kir ti loin Pu Cung Hu tawlrelpinak in Hakhathar ah inn an hlan in khua an sa.

Pa bik nih a laimtakmi hna chungkhar i minung pakua an si. Cun a dang ralzam chungkhar pakhat zong Hakhathar ah naite ah an rak i tthial ve.

COVID-19 boruak ruang ah rian ttuan awk an i hmuh lo caah harsa ngai in khua an sa hna.

Hakhathar ah a phanmi Paletwa ralzam hna bawmhnak kong he pehtlai in Hakha mino President Van Bawi Lian nih, “Hakhathar mino nih hi inn chungkhar hna hi kan zoh sawh khawh hna lo caah bawmh halnak kan ngeihpiak hna. January thla thawk in January 16 tiang Hakhathar mino nih kanmah Hakhathar chung lawng ah inn kip ah kal inn bawmh halnak kan tuah,” tiah The Chin Journal ah a chim.

“Hi bawmh kan hal mi ah kan hmuh mi cu Kawram phaisa in 900,000 MMK, facang tun 5, thilpuan bag 5, cun, chiti le cite tlawmpal zong aa tel. Kan hmuhmi hi anmah kan pe rih hna lo. Mino biaruahnak ngeih tthan dih hnu ah kan pek te hna lai,” tiah Van Bawi Lian nih a chim chap.

Latest News

News in Burmese