Hakha Khuathar ah Ngakchia a Tlaihrem Timi Pa Kum (10) Thong an Thlak

| The Chin Journal | Hakha, Chin State

Hakha Khuathar ah khua a sami kum 4 ngakchia nute a tlaihrem tiah tazacuaimi Myat Thu Aung cu Hakha District Biaceih zung nih nihin ah kum (10) thongtlak ding in dan a tat, tiah thawng kan theih.

Hi thil a can hi aluancia July thla ah khan a si i, Myat Thu Aung te lei nih sihni an hlanmi pa dam loin a um caah biaceih zung chuah ding voi hnih voi thumpi an let i, nihin zing ah a donghnak bik biachahnak an tuah khawh hi a si.

Myat Thu Aung hi kee-thum motorcycle (သုံးဘီး) a mongmi a si. Myat Thu Aung i a fa le ngakchia nute hi hawikom an si.

July 27 zanlei sml. 5:00 in 6:00 karlak hrawng ah khan ngakchia nute nih a hawi len ah Myat Thu Aung te inn ah a kal. A hawi a lennak ah cun atu bantuk in thil a ton hi a si.

Ngakchia nute inn a rak ttin tik ah a chiattha a fah tuknak kong cu a nu a chimh. Zeidah a cang timi a nu nih a hal tik ah ngakchia nu nih thli sining cu a chimh.

Myat Thu Aung cu ngakchia nute chungkhar nih report an tuah i, pohma no. 376 le no. 511 in sual an phawt hnu ah nihin zinglei ah kum (10) thongthlak ding in dantatnak an pek hi a si.

Pohma no. 376 hi tlaihrem sualnak a tuahtu pawl dan an tat hnanak a si. Cu pohma ah cun kum 12 tang ngakchia le pumtlamtlinglo a tlaihremtu cu a tlawm bik kum 20 thongthlak an si lai tiah aa ttial.

Cun, pohma no. 511 hi mi pakhatkhat cung ah sualnak/fahnak tuah ding in i zuamnak/i timhlamhnak (ကြိုးစားအားထုတ်မှု) a si.

Latest News

News in Burmese