Hakhalay Khuami Pu Sum Lian Thawng SAC Ralhrang nih an Thlah Than

| The Chin Journal | Hakha, Chin State

Nizaan (August 12) ah Hakhalay khua kiangkap ah SAC ralhrang nih an tlaihmi fa 2 ngei Pu Sum Lian Thawng cu nihin zinglei ah him tein an thlah tthan, tiah thawng kan theih.

Kahdohnak a chuah lio ah Pu Sum Lian Thawng hi Lo in a tlun lio a si i, SAC ralhrang nih an rak tlaih.

Khuami pakhat nih, “Pu Sum Lian Thawng hi mipumrua fate a si. Miping ngai zong a si i, an tlaih lio ah hin a kut hri in an ttem i cuticun Natchawng lei ah an kalpi. A sining le a konglam pawl zong SAC ralhrang a chimh hna i ka thlah tthan ko u tiah a nawl lengmang hna hnu ah nihin zinglei ah an thlah tthan,” tiah a chim.

Pu Sum Lian Thawng te unau hi ngakttah an si pin ah a fale pahnih le a naule a cawmkengtu fa upa a si caah SAC ralhrang nih an zaangfah i an thlah tthan zong a si kho, tiah a cunglei khuami nih a chim chap.

Pu Sum Lian Thawng cu Hakhalay ah him tein a phan tthan cang.

Hakhalay khua he aa pehmi Panmunchawng khuami Pu Joshua belte cu Natchawng khua pawng tlanglawng lamkam ah SAC ralhrang nih a lu ah meithal in an kah i a nunnak a liam.

Latest News

News in Burmese