Hakha Vuanci Quarters in i Kah Thawng a Thang

| The Chin Journal | Hakha, Chin State

Hakha khua, Hniarlawn lam lei ah a ummi vuanci quarters hrawnghrang in tu zaan sml. 6:45 hrawng ah meithal puah thawng voi tam nawn a tang i ralkap pawl anmah le anmah an i kap, tiah upa pakhat nih a chim.

Meithal puah thawng a than hnu in Ambulance pakhat zong cuka lei ah cun khulrang in a kal i sml. 7:40 hrawng ah cu Ambulance cu a rak kir tthan.

“Ralkap pakhat nih a ttuan hawi ralkap pahnih meithal in a kah hna hnu ah amah tein aa kap ve. A kahmi hna pahnih cu a hmun ah an thi. Amah tein aa kapmi hi a hliamhma a fak ngai. A thih lai le a nun lai a fiang lo,” tiah upa pakhat nih a chim.

A dang upa pakhat nih, “Vuanci inn kutka a congtu palik le ralkap karlak ah i kahnak a chuak. Ralkap 2 an thi i, palik hliam a pumi an um,” tiah a chim.

Ngandamnak lei rianttuan pakhat nih, “Minung pathum an thi tiah a kan chimh ve,” tiah The Chin Journal ah a chim.

Hi kong he pehtlai hin hliamhma a pumi le a thimi kong ah The Chin Journal nih mithmuh in kan fehter kho rih lo.

Latest News

News in Burmese