Hakha Univeristy Biakinn Mah Thazaang Tein an Sak Cuahmah, Bawmh an Herh

| The Chin Journal | Hakha, Chin State

Hakha University tualchung siangngakchia le sayate i pumhkhawmhnak Biakinn (Chapel) cu mah thazaang tein an sak cuahmah i bawmhnak zong pek an herh, tiah ttuanvo ngeitu sin in thawng kan theih.

Hi Biakinn hi ting 1,600 MMK in sak ding in budget suai a si i, Hakha khuanu khuapa nih ting 100 MMK, HBA nih ting 250 MMK, ramdang lei in bawmhnak ting 100 MMK hrawng le sianggnakchia nih bawmhnak an hal khawhmi ting 100 MMK, azapi ting 550 MMK in an sak cuahmah.

Myanmar ralkap bawizik Snr-Gen Min Aung Hlaing nih mirang vawlei tun 1,000 le inncungcih champhio a bawmh ve hna.

Pu Chum Ling ta a simi Rung Family Company nih biakinn saknak rian cu an i tlaih i tangka zong anmah nih an rinpiak chung hna i cuticun an sak cuahmah hi a si.

Hakha University Rector Dr. Lian Za Khup/Photo-Pa Tum (The Chin Journal)

Hakha University Rector Dr. Lian Za Khup nih, “Rung Family Company nih a sak rian an tlaih i, anmah nih tangka an rin buin an sak cuahmah. Tangka a chuak chom in kan pek hna,” tiah The Chin Journal sin ah a chim.

TABC zong ah bawmhnak an hal i ting 100 MMK bawmh ding in an leh hna. FBA (Falam) sin zong ah bawmhnak an hal i kan in bawmh hna lai tiah an ti ve hna.

“Atu tiang ah cun 50% kan lim cang. Ting 1,600 MMK nih hin a inn saknak le electric mei tuahnak tinag a zawh lai. Asinain, a chung i thilri dangdang le Sound System pawl ca ah tangka tampi bawmh kan herh rih ko. Chinmi nih rak kan bawm cio u,” tiah Dr. Lian Za Khup nih a chim chap.

Hakha Univerisity cu Kawlram a Pakhatnak Bik Comprehensive University a Si

Hakha College cu University ah pek a si cang bantuk in University a hun si hnu ah zei bantuk thlennawnnak dah a um lai timi kong he pehtlai in Hakha University Rector (ပါမောက္ခချုပ်) Dr. Lian Za Khup cu September 17 ah The Chin Journal nih kan ton i biahalnak kan rak ngeih.

Dr. Lian Za Khup nih, “College ah cun kum 2nk tiang kai khawh a si i, siangngakchia pawl Degree peknak nawl an ngei lo. Degree College ah cun kum 4nk tiang cacawn khawh a si. Asinain, Degree peknak nawl a ngei ve lo. University tu cu amah tein Degree zong aa pek khawh cang,” tiah College, Degree College le University an i dannak a langhter.

Hakha University cu Kawlram chung i aa dang ciomi Unversity phun thum phun li nih an cawnmi Major pawl kha hmun khatte ah cawnnak nawl a ngeimi Comprehensive University a si, tiah Dr. Lian Za Khup nih a chim chap.

“Kalay University le kannih Hakha Unveristy aa dannak cu kannih cu University kip nih an cawnmi pawl kha cawnnak nawl kan ngei. Comprehensive University ti zong in auh a si. Asinain, Hakha University tiin kannih nih cun kan auh ko lai. Kalay University i an cawnmi Major zapi khi Hakha University ah cawnnak nawl kan ngeih pin ah Law, Civil, Electronic le Mechanic major pawl zong cawnnak nawl kan ngei i, siangngakchia nih kum 6 an cawn hnu ah B.E degree pek an si lai. Cun, Computer Science zong cawnnak nawl kan ngei. Kum 5 an cawng lai. Cucaah, Hakha University cu Major phun kip cawn khawhnak University a si. Kawlram chung ah mah bantuk University hi a dang ah a um rih lo. Hakha University hi a pakhatnak bik a si, ” tiah a chim.

Hakha University ah Degree laknak innpi zong an sak cuahmah lio a si. Budget zong tlamtling in a tla cang i tuan ah an lim lai.

Hakha University onnak puai cu Surbung vanlawng bual onnak an tuah tik October thlathawh lei ah tuah ve ding in timhtuahnak kan ngei, tiah Dr. Lian Za Khup nih a chim.

Latest News

News in Burmese