Hakha Thilman a Kaimi an Um Nain Micheu Thilman a Kaiter Ngam Lo an Um Ve

| The Chin Journal | Hakha, Chin State

COVID-19 pulrai nih Laitlang a vun kan phanh hnu in thilman tlawmpal a hun kai ve i, dawrngeitu cheukhat nih thilman an kaiter nain micheu thilman kaiter ngam loin a ummi an um ve, tiah thawng kan theih.

COVID-19 pulrai kilvennak ca ah Hakha khuachung ah thilphor motor pawl luhter an si ti lo i, dawrngeitu nih thil lak tik ah khualeng ah vung kal i, thil an thlaknak hmun ah va lak a hau.

Thilthlak man a kai pin ah khuachung le thiltlaknak hmun karlak thilphorhnak zong a man a kai deuh cang, tiah Hakha dawrngeitu pakhat nih a chim.

“Atulio thilzuar cu a fawi lo. Ahlan ah khan cun dawrthil rawnnak caku bawm pakhat khi Hakha khuachung tiang an rak phakpi ah khin 200 lawng a kan lak. Asinain, atu cu 500 a phan cang. 300 a kai cang. Ahlan ah coffee mix htoh khat ah 100 a simi kha atu cu htoh 4 ah 500 a si cang,” tiah The Chin Journal ah a chim.

Hakha khuachung i dawr cheukhat cu thilman tlawmpal a kaitermi an um nain micheu tu cu acozah dantat an ttih ruang ah thilman kaiter ngam lo zong an um ve.

“Micheu thilman a kaitermi zong an um. Asinain, kannih cu kan kaiter ngam lo. Atu ning a si ahcun tlawmpal cu kai ve a hau te ko lai,” tiah a chim chap.

COVID-19 a chuahka ah khan Hakha Sipin nih thilman a kaitermi paohpaoh cu phung ning in dan kan in tat hna lai, tiah nawl an rak chuah caah thilman kaiter ngam loin a ummi dawrngei pawl an um ve hi a si.

Abikin, khualeng Car Gate ah thilthlatu nih thil an thlak man le Car Gate in Hakha khuachung dawr karlak thilphorh man a kai hi a si, tiah kan theih.

Latest News

News in Burmese