Hakha Sizung ah Mizaw Zohmi Motorcyle a Firtu Pa Hi a Hmutu Nih Thawngthanh Cio U

| The Chin Journal | Hakha, Chin State

Hmanthlak kan rak tarmi hi Hakha sizung ah Thantlang peng khuate lei in mizaw a rak zohmi hna i motorcyle a hlan i a fir behtu pa si, tiah motorcyle firpiak a tongmi chungkhar lei nih an chim.

Thantlang peng, Lungding khua in Hakha sizung ah mizaw a rak zohmi Sang Cung Nung cu June 4, zinglei sml. 8:00 hrawng ah Mawia tiah auhmi pa nih a rianrannak i sii cawk ka duh caah motorcycle ka hlan ta tiah bawmh a hal.

Mawia timi pa nih, “Ka pi ca ah sii a rannak in cawk ka hau,” tiah a ti caah Sang Cung Nung nih a zaangfak i a theih ballomi a si nain a motorcycle cu a hlanh ve.

June 4 ah Motorcycle firpiak a tongmi Sang Cung Nung| Phone – 09780252082

Asinain, Mawia timi pa cu Sang Cung Nung motorcycle he atu tiang a tlau i a umnak an hngal ti lo.

Sang Cung Nung chungkhat Thantlang khuasa John Lian nih, “Thantlang zong in minung pahra hrawng nih kan bawh. Asinain, a rak chuak lo,” tiah a chim ve.

June 5 zinglei ah Sang Cung Nung nih, “Atu kha Hakha ah a um ko an ti. Kan hmuh ko a kan ti. Kan kawl cuahmah lio a si,” tiah a chim.

“A hmanthlak zong hi ahlan ah Kalay le Hakha ah motorcycle a fir bal an ti i an tarmi kan lakmi a si,” tiah John Lian nih a chim.

Lam palik PK sin le Hakha palik sin zong ah thawngthanhnak kan tuah cang tiah chungkhar lei nih an chim. Asinain, atu tiang an hmu rih lo.

Ahlan ah Hakha ah Motorcyce a rak fiarpiakmi chungkhar Pa Thawng nih, “Hi pa hi thonginn ah chiah bak ding a si. Kan Cycle a rak fir lio ah thong kan thlak nain kan zaangfah i kan chuah than. A firmi a tam tuk cang. Zaangfah ding a si lo,” tiah a chim.

Hakha khuachung ah siseh, hmun dangdang zonh ah siseh, Mawia timi pa a hmutu nih Sang Cung Nung Phone 09780252082 ah thawngthanhpiak ding in chungkhar lei nih bawmhalnak an tuah.

Latest News