/

Hakha Quarantine a Lutmi Cheukhat an Daitlan caah Pawngkam a Thurhnawm

The Chin Journal | Hakha | Chin State
Hakha University ah Quarantine a lutmi hna nih tithawl chung ah zun an zun i an hlonhmi

Hmundang in Hakha ah a rak tlung i Quarantine a lutmi micheukhat zunte le hmunthur i fimhlawm ningcang an daithlan deuh ngai caah Quarantine certer pawngkam pawl an thurhnawm, tiah ttuanvo ngeitu hna sin in thawng kan theih.

Hakha University Quarantine Center ah ttuanvo ngeitu a simi Kham Lung Mang nih, “Zunput le hmunthur kuang tibantuk ttha tein kan chiahpiak dih ko hna nain Quarantine a lutmi micheu cu siikaan an ngei lo i, pawngkam a thurhnawm ngai tawn,” tiah The Chin Journal ah a chim.

Ningcang loin Kunya haang chak, hmunthur mah duhnak hmun ah hlonh le tithawl chung ah zunte zun i thlalangawng in leng ah an hlonh men hna, tiah Kham Lung Mang nih a chim.

“Tithawl chung ah zunzun i leng ah hlonh an hmang. Kan hnu thla lebang kha cu an luan ngaingai. Atu zong hi an hmang rih ko hna. Dinzu zong lenglei in an i chaan hna i, zuu an din tik ah pawngkam harnak an pek tawn hna,” tiah a langhter.

November 13 zong ah khan tithawl chung ah zuu an rawn i, rawl chanh lio ah lenglei in an rak pek hna caah cu zuu cu ttuanvo ngeitu nih an chuh hna.

Yangon in a rak tlung i Hakha University ah Quarantine a lutmi pa pakhat nih, “Quarantine luh ding in kan rak phak kaa khan cun kan umnak pawngkam a thurhnawm tuk. Kanmah nih kan thianhlimh dih i atu hi kan um sia a rem deuh ngai cang,” tiah a chim.

Hakha University ah in Quarantine a lutmi minung 70 leng an um. Hakha Univeristy lawng si loin abikin pa pawl Quarantine an chiah hnanak hmun pawl ah hin zu i chanh le tithawl chung ah zunzun i hlonh an hman caah pawngkam zohdawh lo ngaiin a um tawn.

Quarantine luh caan chungte ah hin cun zuu zong din loin um kho hna sehlaw a ttha. Cun, tithawl chung ah zunzun i leng ah hlonh zong hi i tthinh cang hna sehlaw a ttha tuk hnga, tiah ttuanvo ngeitu pakhat nih a langhter.

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19