Hakha Peng, Bungzung Tiang Tlanglawng Lam an Ser Lai

| The Chin Journal | Hakha, Chin State

Biletmay/Cement sehzung an sak nakding Hakha peng, Bungzung khua tiang tlanglawng lam an phakter lai, tiah theih a si.

Chin ramkulh sipin vuanci U Soe Htet nih, “Kum khat ah cement tun 150,000 chuah khawhnak Bungzung Cement sehzung kan sak lai. Tun 100,000 kan chuah khawh hmanh ah Chinram GDP a kai lai. Atu sehzung hin tlamtlinnak kan hmuh ahcun a dang sehzung kan sak chap lai. Cement sehzung pahnih a um ahcun kan ram ah rian a tam lai,” tiah a chim.

Bungzung ah Cement sehzung sak ding in Tender voi khat an rak auh bal cang. Asinain, Tender a hmutu Company nih ramkomh cozah sin ah phaisa a batmi a cham rih lo caah rian letpiak than a si.

Cucaah, Tender a thar in an auh i aho Company nih dah a hmuh timi cu fiang in theih a si rih lo.

“Pungtawng-Pungngia tan in an rak sermi tlanglawng lam a um. Atu a rawh caah hman loin a um. Cucu kan remh lai i Bungzung tian phan ding in kan tuah lai,” tiah U Soe Htet nih a chim chap.

Bungzung ah sak dingmi Cement sehzung kong he pehtlai in kiangkap a ummi cheukhat nih an dohdal ve caah Chin ramkulh cozah lei zong nih mipi he chawnhbiaknak a tuah cuahmah, tiah theih a si.

-Chin World

Latest News