Hakha Nawi Dam Ser Lo Ding in Myanmar President le Suh Kyi Sin Ca an Tial

| The Chin Journal | Hakha, Chin State

Chin ramkulh cozah nih Hakha Nawi ah Dam ser ding in timhtuahnak a ngeimi kong he pehtlai in Nawi ah lo a ngeitu chungkhar 30 hrawng nih dohlonak ca Myanmar President U Win Myint sin ah le Daw Aung San Suh Kyi sin ah an ttial, tiah thawng kan theih.

July 27 ah khan Daw Aung San Suh Kyi sin ah ca an kuat i atu September 4 ah khan President U Win Myint sin ah ca an ttial tthan.

Chin ramkulh Chief Minister Salai Lian Luai sin zong ah March 11 ah khan duhlonak ca an rak ttial cang.

Nawi ah Dam an ser ahcun Hakha hmunthur vialte Nawi tidil ah aa dil dih lai; Nawi ah lo a ngeimi chungkhar 30 hrawng pawcawmnak a hrawh lai; Hakha vawlei a dawrh ca ah hakha nitlaklei innhmun 676 a umnak le Hakha University ca ah ttih a nung tiah duhlonak ca a ttialtu hna nih an langhter.

“Nawi Dam tuah ding in acozah nih khua an khaan lio ah Nawi ah lo a ngeitu pawl chimh loin khua an khaan hnu ah a kan chimh i min a kan thutter. Min nan thut lo ahcun nan lohmun pawl nan sung lai a kan ti. Liamrulhnak kan in pek hna lai an ti ko nain Kawlram liamrulhnak cu a tlawm tuk caah kan duh lo,” tiah Nawi ah lo a ngeitu a simi Pi Sung Thai nih a chim.

Acozah lei nih pehzul in Nawi ah Dam an tuah a si ahcun lo ngeitu hna nih aluancia caan i lo an tuahnak ah a retheihmi vialte man le atu an tuah liomi le hmailei an tuah lai dingmi retheih man vialte kan hal dih hna lai, tiah Pi Sung Thai nih a chim chap.

Nawi Dam cu Chin ramkulh cozah nih Budget 10 billion hmang in kum 3 chung ah ser ding in timhtuahnak a ngei. Budget acheu hi ramkomh cozah nih a chuahpiak lai i, acheu hi Chin ramkulh cozah nih amah tein a chuah ve lai, tiah kan theih.

Latest News

News in Burmese